Aruba Port Authority (APA ) tambe a tuma nota di e preocupacion cu ATIA a yega di expresa tocante e barco di container cu no por a drenta waf na Barcadera y mester a bay pa Corsou. Director di APA, Jossy Figueroa ta comparti e opinion cu riba e parti di comunicacion nunca mester bisa cu “nos ta cla”. E ta haya cu e comunicacion semper mester keda mehora y mester sigui y traha riba dje.
Tambe el a splica tocante e incidente aki cu tabatin di haber cu un di e barconan mas grandi cu nos ta haya container cu mester yega riba un diamars pero a haya retraso. E barco a yega su dia siguiente un diaranson. Pero e dia ey tabatin otro barco cu mester drenta e mesun dia ey, y ya caba nan tabata trahando cu ne den waf.
Segun sr. Figueroa e echo cu e barco grandi di container aki mester a bay diahuebs pa Corsou, nan a dicidi bay Corsou prome, y despues bin Aruba. E problema ta debi cu e barco a yega laat, segun director di APA.
Pero el a laga sa cu esaki no a kita cu APA y Astec a sinta hunto pa wak con nan por preveni cu cierto situacion asina ta bin dilanti. Den e caso aki si un barco ta bin cu retraso con nan por organisa nan mes di tal manera cu niun parti ta wordo afecta, ni e barco cu a yega laat, ni APA, ni Astec, y sigur ‘no pueblo’.
E ta haya cu henter aña tur cos ta bayendo bon pero un biaha cu e no ta bay bon ta crea un impresion como si e waf no ta trahando bon. Pero esaki no ta kita segun director di APA cu nan ta bay wak cu un situacion similar no presenta mas.
