2017 tabata un aña di hopi movecion pa Aruba Port Authority (APA). Director di APA, Jossy Figaroa a declara na Bon Dia Aruba cu ‘den general nos ta hopi satisfecho’.
Nan ta trahando riba tres punto. Antes tabata dos, kiermen e waf di crucero na Oranjestad y e waf di container na Barcadera. Pero awor nan ta bezig cu e proyecto di Port City cu lo wordo desaroya riba e area di ex waf di container.
Aña 2017 a nifica un record nobo pa loke ta cantidad di turistanan abordo di e barconan crucero cu a bin Aruba. E cifra di pasahero a surpasa 700 mil y otro aña e ta mustra cu ta bira miho ainda, segun sr. Figaroa.
Pa loke ta trata e waf di container na Barcadera e actividad di transporte di carga a registra un crecemento chikito. “Nos no por ta mal contento. Den general nos di APA ta hopi contento con e aña a bay”, el a bisa.
Port City
Igualmente director di APA a expresa cu ta hopi optimista pa 2018. Nan ta bay habri nan panorama di negoshi mas, y riba esey nan a traha hopi riba e plan di Port City. Awor cu tin cambio di gobierno, y APA ta wardando pa scucha cual ta e instruccion y ideanan nobo cu tin pa sigui cu e plan aki.
Sr. Figaroa a bisa cu e Master Plan di e proyecto di Port City ainda no ta cla. Awor nan ta bezig cu ne. APA a reuni cu minister di Turismo, Dangui Oduber (MEP) y nan a informa cu pa fin di maart 2018, nan ta spera cu lo por entrega un plan finalisa di e proyecto aki. Pa asina e mandatario di Turismo hunto cu su colega di Infrastructura por tuma decision ariba dje.
APA ta kere cu unabes e Master Plan aki ta wordo aproba, eventualmente pa memey di otro aña entre juli y augustus, nan ta bay over pa entrega e prome parcelanan. Despues ta bin full e proceso di tramite di permiso pa construccion, etc.. Director di APA no ta kere cu pa otro aña ainda nos no ta bay wak construccion, pero e ta kere cu pa 2019 si e prome construccion ta bay tuma luga.
Sr. Figaroa a indica cu minister Oduber di Turismo a bisa cu e mester ta un plan cu nos di Aruba mes por ta contento cu ne. “Mi ta kere sigur cu loke nos ta bezig aworaki ta algo cu nos di Aruba no solamente lo ta contento, sino orguyoso di locual nos ta bay tin den nos waf na Oranjestad.”
