Director Financiero di Aruba Port Authority (APA), Humfrey Tromp a comenta riba e desaroyo cu barconan mas grandi ta bini Aruba y asina trece mas turista crucero. E ta haya cu mester percura riba calidad di servicio tambe.
Sr. Tromp ta trece su remarca ta cu nos por bin cu cantidad di barco cu ta move cantidad di turista riba nos isla, pero nos mester percura pa duna nan e miho servicio. Di ki bal cu nan por bin cu e barconan grandi, pero si no tin suficiente taxi of cu e trafico den e area aki ta bira un caos; of e turistanan aki no ta haya suficiente tour di calidad, esaki no lo trece un efecto positivo pa nos.
“Experiencia cu turista ta pasa aden ta pone cu e ta bin bek. Na momento cu nos ta sigui crece no solamente mester percura pa e infrastructura di nos waf, pero adicionalmente e servicionan cu ta wordo duna na e tipo di turista crucero aki, mester ta uno di calidad.”
Pero el a destaca cu nan ta trahando hunto riba esey teniendo na cuenta cu e encuesta cu a wordo haci pa mehora unda nan tin cu mehora.
Den pasado APA mester a nenga algun barco pa bini pa motibo di falta di espacio pasobra mester para algun barco di container den e parti di carga. Sinembargo na momento cu e terminal di carga a wordo muda pa waf di Barcadera, esaki a trece un espacio extra adicional pa ricibi mas crucero den temporada halto.
Un aspecto cu ta limita e presencia di mas crucero riba nos waf ta cu e barconan ta birando mas grandi. Nan ta barco entre 220 pa 350 meter di largura. Antes APA lo por pone dos barco di alrededor di 280 meter. Pero awo cu e largura di e boto a bira mas largo, nan ta uzando e parti di carga como extra. Actualmente e capacidad ta yega pa dos barco grandi y dos chikito. Pero si nan ta mas chikito APA lo por acomoda cinco barco crucero. Pero si e barco ta mas largo cu 300 meter te cu tres barco grandi nan por mara den e waf na Playa.
Nan ta uzando e parti di carga caba pero nan ta bay drech’e, ya cu nan a haya e peticion cu e barco mas grandi cu tin aworaki, esta “Freedom” por bini; locual ta demanda pa bin cu algun adaptacion den nos waf pa asina facilita entrada y salida di e barco aki.
Mas turista crucero pa 2017
Pa 2017 tin proyecta alrededor di 750 mil turista crucero basa den un capacidad di un 98% di cada barco cu ta reserva pa bin Aruba. Aunke e ta algo promedio, ya cu e cruceronan di e compania Carnival hopi biaha ta surpasa e capacidad di 100%.
Ademas Pullman Tour cu lo bolbe Aruba otro aña y cu ta bayendo Europa ta pidiendo si tin espacio pa e otro aña y pa 2018 den temporada halto. APA tin 25 call extra pa e temporada halto ey. Sinembargo nan no lo por aloca nan pasobra ta yen caba. Cu e agencia di e compania crucero aki a coordina pa nan bin un siman si un siman no pa asina yega na 12 call adicional. Nan ta cifranan cu ainda APA no tin den nan programa pasobra APA mester haya un confirmacion di nan. “Miho so e lo por bira.”
E ta bisa cu hopi barco ta dicidi pa bin den temporada considera como low season. Pa prome biaha nan ta wak tur luna entre mei te september e presencia di 10 barco tur luna aden, locual no tabata e caso den pasado, sigur no tur luna. Ta asina cu nan ta hayando y trahado cu barconan di e compania Tuit cu ta biniendo for di Europa, y APA ta concentrando riba e destinacion aki pa no depende unicamente di un mercado. Tur e factor aki ta yuda pa aña 2017 ta bay ta un “aña super” pa presencia di barco crucero den nos waf di Playa.
