Aruba Port Authority (APA) a cuminsa cu cierto preparacion pa ehecuta formalmente nan proyecto grandi di Port City riba tereno di ex waf di container entrante otro aña 2019.

Director di APA, Jossy Figueroa a laga sa cu e interes ta grandi riba e proyecto aki. Te hasta linea di crucero cu a yega di haci inversion den cierto terminal di Caribe, ta interesa. Sinembargo na Aruba nan no a inverti, y APA tambe ta masha cauteloso riba e tipo di inversion aki. Tabatin compania crucero cu tabata interesa riba full e tereno, unda APA lo kier bin cu Port City. Pero tambe paisnan manera Merca, Hulanda te hasta Venezuela a mustra interesa riba e tereno.

APA a sinta na mesa cu Royal Caribbean Cruise pero nan tabata kier e tereno full pa nan so. Pero APA a rechasa e proposicion aki, ya cu tin pa ehempel Labadee (Haiti), unda e compania crucero kier tur cos pa nan so. Pero tambe nan a yega di haya algun reaccion di otro linea crucero manera Carnival a laga sa APA cu si nan ta cera un deal cu Royal Caribbean, nan no ta interesa mas pa bin Aruba.

APA no a bay di acuerdo pa otorga full e tereno premier aki cu ta un di e delaster cu tin den e area aki di Oranjestad, na e compania aki. Pero si nan a laga sa na Royal Caribbean cu si nan ta interesa riba un parcela, APA no tin niun problema. El a afirma cu ta un parcela so y no full e tereno. “Pero basta cu nan paga loke nan tin cu paga”, el a bisa. Esaki ta un forma pa tene e linea crucero aki tambe mas mara na Aruba. Pero esaki no ta stroba pa otro compania sigui opera pa bin Aruba.

Gobierno y criterio
Director di APA a bisa cu denter di algun luna nan lo duna un splicacion mas detaya riba con e proyecto aki ta hinca den otro. Nan ta papiando cu gobierno pa nan bin cu nan adaptacionnan y cambionan pa nan por sigui cu e proyecto. Nan ta spera cu pronto nan lo por haya aprobacion di e gobierno nobo di coalicion (MEP-POR-RED), pa otro aña ya por tin construccion riba dje. APA a tuma hopi tempo prome cu a bin cu e plan di Port City. Pero nan ta considera necesario pa gobierno tin full espacio pa bin cu nan adaptacion. Gobierno tambe ta interesa pa pronto e proyecto aki bay den ehecucion.

Pa loke ta e proyecto di Port City mes, sr. Figueroa a bisa cu APA ta preparando un plan masha grandi mes pa full e tereno aki. Nan ta kere cu na Aruba mes tin suficiente desaroyado interesa pa haci inversion den e area aki. “E ta un proyecto di hopi interes dor di e local nan mes,” el a bisa. Mas bien e ta haya e discusion cu tin ta sinta riba con nan ta bay desaroye. APA ta bin cu e reglanan ken ta bin na remarca pa cada localidad of parcela.

“No ta gobierno ta bay duna tereno na e hende, pero esey ta APA. Pero nos kier hacie mas obhetivo posibel.” Nan lo bini cu criteria fiho pa esunnan cu kier aplica sa kico nan tin cu cumpli pa bin na remarca. Nan kier pa mas tanto inversionistanan Arubano bin na remarca pa haya un parcela den e tereno tan codicia aki. APA su meta ta cu nos tur por ta orguyoso di e proyecto aki. Pronto nan lo bay duna un presentacion unda comunidad di Aruba pa medio di prensa lo haya sa con bunita e proyecto aki ta.