Recientemente un delegacion di APA a participa den un conferencia internacional organisa pa Florida Caribbean Cruise Association (FCCA), un organisacion di cual Aruba ta un partner di basta aña den e meta pa sigui e ultimo desaroyonan cu tin den mundo di crucero.
Segun e comunicado cu bon Dia Aruba a ricibi ta indica cu “Port Destination Summit 2019” ta un evento unda socionan importante den mundo ta topa otro y e biaha aki, e encuentro a tuma luga na Alemania for di 11 pa 13 di september y a haya e nomber di “Cruise & River Cruise Convention 2019”.
Aruba tabata un di e 14 partnernan di FCCA cu a participa den e #STCEurope cu tin como meta traha pa conecta Caribe y Latino America cu entidadnan di e mercado crucero Europeo pa encuentronan, networking y oportunidadnan di exhibicion na Seatrade Europe y otro luganan. FCCA ta actua manera un mediador entre por ehempel Aruba Ports Authority (APA) y companianan crucero of agencianan na Europa.
E director di FCCA Michele Paige den un mensahe publico a gradici entre otro e delegacion di Aruba, cu a contribui na e exito di e di tres encuentro di Seatrade Europeo. “Mas importante cu e cifranan, e aumento di participantenan ta demostra loke partnernan a experencia cu trahando hunto na Europa, e ta duna resultado. FCCA su meta principal ta pa traha riba e exito mutuo aki, y nos ta spera di sigui dilanti pa haci tur lo posibel pa yuda nos partnernan di Seatrade Europe capitalisa riba e mercado importante aki.”
APA ta consciente di importancia cu e mercado Europeo aki tin pa Aruba, tanto pa loke ta e bishitantenan abordo di crucero pero pa futuro bishitantenan cu ta pasa un vacacion mas largo riba e isla. Ta un mercado unda e poder di compra ta mas grandi y ta persona cu nan dianan di vakantie ta mas largo cu e bishitantenan di e area aki banda.
E delegacion di APA tambe tabatin un booth unda cu a suministra tur informacion di e isla y por a palabra encuentronan importante pa reenforsa e lasonan di Aruba cu e continente Europeo.
