APA a ricibi un bon noticia di FCCA: Caribe y Latino America ta e prome cu lo ricibi cruceronan

Dia 13 di maart tabata e ultimo dia cu APA a ricibi un barco crucero den waf di Oranjestad. E fecha aki a coincidi cu e dia cu nos pais a haya su prome dos di Covid-19.

Director di Aruba Port Authority (APA), Marc Figueroa a declara na Bon Dia Aruba cu mescos cu otro compania, e crisis di coronavirus/Covid-19 aki a touch APA tambe. Pero dialuna nan a haya un noticia ‘un tiki beneficioso.’ Ta asina cu Florida- Caribbean Cruise Association (FCCA) cu ta un socio strategico di APA, ta premira cu nos region Caribe y Latino America ta esunnan prome cu lo bay cuminsa cu e operacion di crucero.

Figueroa ta haya cu e notificacion aki di FCCA ta cuadra cu e realidad considerando cu e low season di Aruba ta e high season di otro region, manera Europa. Sinembargo e no ta kere cu mirando e crisis actual cu e barconan ta bay Europa, y specialmente considerando e situacion cu Europa ta pasando aden cu e Covid-19.

Ainda ta dificil pa bisa cu dia APA lo bay ricibi e prome barco, pero nan ta spera cu pa augustus y september por tin movecion den waf di Oranjestad. APA ta consciente cu no lo cuminsa cu full un schedule, pero si cu uno minimo. Igualmente e barco crucero no ta bay tin un ocupacion di shen porciento, sino cu seguramente e lo bira masha minimo tambe. E ta haya cu importante di e fase aki ta, no solamente di haya e lineanan crucero, sino cu Aruba por haya e confiansa bek den e biahamento.

No cancelacion.
Desde dia 13 di maart ultimo, APA no a ricibi niun barco crucero mas y te na e momento aki. Esaki a keda suspendi te cu dia 26 di juni venidero. APA no a ricibi niun cancelacion te cu 26 di juni proximo, y despues di e fecha aki niun cancelacion mas no a drenta, director di APA a sigura na Bon Dia Aruba. Pero APA no ta descarta cu eventualmente lo por drenta algun cancelacion y nan ta tene cuenta cu esaki.

Seguramente si gobierno of crisis team ta dicidi di habri nos fronteranan, seguramente te cu 26 di juni e operacion di crucero ta para na Aruba. APA a traha nan scenarionan, pero nan ta premira cu pa e siguiente luna no ta bay tin operacion. Nan a trahando cu nan socionan internacional manera FCCA

cu ta un mediador cerca su miembronan y e linea nan crucero.

E crisis cu henter mundo ta pasando y cu Aruba no ta un excepcion, ta afecta nos principal industria y pilar di nos economia, esta turismo cu a cay cardinalmente, despues cu gobierno a decreta e lockdown. Pero tambe otro paisnan a cera nan frontera, pa evita e expansion di e pandemia di coronavirus/Covid-19.