A pesar cu economia no a crece; y cu fondo di pensioen (AOV) no a recupera totalmente, Gobierno a anuncia un aumento di un 2.3% riba pensioen.
E fondo di pensioen di behes (AOV) administra pa Banco di Seguro Social (SVb) ta uno hopi importante. Nan calculacion ta mustra cu un 80% di e 19 mil pensionado na Aruba, kiermen 15 mil pensionado, ta depende directamente di e pensioen di AOV como unico fuente di entrada.
Segun director di SVb, Edwin Jacobs, un aspecto cu ta mustra cu e fondo ta bayendo riba un bon caminda ta, cu e fondo di AOV atrobe ta den condicion cu nan por duna un aumento pa nos pensionadonan.
“Bo no por sanea e fondo via di laga e pensioen bay atras. Pasobra bo ta perhudicando e 15 mil hendenan cu e placa ey nan tin pa nan biba.”
Nos sa tambe cu e suma di pensioen no ta duna espacio pa biba comodo compara cu nos costo di bida. “Solamente e ta permiti bo hala rosea”, segun sr. Jacobs. Ademas ta na caminda e problema cu ta bay manifesta su mes mas e proximo aña, esta cu mas ciudadano no tin pensioen completo. “Nan tin pensioen corta cu e consecuencia cu lo tin menos ainda cu e mil y pico cu nos ta dunando.”
Economia y aumento
Sr. Jacobs ta laga sa cu pension no ta solamente esun cu ta sigura y cu a bira pensionado, sino e grupo grandi cu ta pensionado caba. A base di un studio cu nan a realisa pa analisa e sostenibilidad financiero di e fondo aki, SVb a premira cu e fondo por mantene e poder di compra di e pension, y unda cu ta posibel aumente.
Ta asina cu gobierno a acerca SVb pa wak si tin espacio pa duna un aumento. SVb a haci su calculacionnan y nan ta kere cu un aumento di un 2.3% ta prudente pa nan por duna na e pensionado. Ya caba gobierno a anuncia e aumento aki, aunke otro luna nan ta bay trata e ley aki den Parlamento. E aumento aki ta encera cu ora bo tin un pensioen maximo, bo ta haya 25 florin ora bo tin pensioen pa soltero; y si bo tin pensioen di casa bo ta haya 42 florin.
Rol di refineria
Sinembargo economia no a crece y no a comporta su mes manera nan tabata spera di dje. Por lo tanto e proyeccion di crecemento no a wordo alcansa, locual di un banda ta retrasa e proceso di recuperacion di e fondo aki cu a yega di confronta su retonan.
Sinembargo sr. Jacobs ta bisa cu e fondo aki no ta den peliger a pesar cu nos economia no a crece, pero si e ta retrasa su recuperacion. Un factor tin di haber cu ainda reapertura di refineria no a cuminsa den full swing; y otro aña e actividad economico genera pa e refineria lo ta un poco mas laat. Pero sin duda e actividad economico genera cu e operacion di e refineria ta bay yuda na e fondo di AOV.
Independiente na e decision politico di gobierno pa anuncia un aumento di pensioen, nos a puntra director di SVb como instancia responsabel pa administra e fondo aki, si e aumento aki ta prudente. El a indica cu a base di analisis SVb ta haya cu e aumento aki ta uno cu e fondo di AOV por carga. “25 florin ta un aumento hopi marginal cu e fondo por carga.”
Beneficio
Sr. Jacobs ta agrega cu pa SVb ta importante cu nan por duna e pensionadonan di conoce cu e fondo ta riba un bon caminda. Pasobra ora cu bo ta reforma e sistema di pensioen tin cu zorg cu tur dos banda por tin e siguransa cu e sistema t’ey pa nan ora cu nan ta yega y den futuro.
P’esey mester ta hopi cauteloso di ki bo ta duna, segun e director. “Si nos por duna 100 florin, nos ta duna 100 florin, pero no por. E ora bo ta duna locual aworaki nos calculo ta mustra.” E aumento di 2.3% riba pago di pensioen ta haci e proceso di recuperacion di e fondo mas largo, debi na e parti economico tambe, pero e fondo por cargue.
Practicamente un aña pasa, 1 di januari ultimo a bin cu un aumento riba pensioen despues di basta aña; y otro aña e pensionado lo beneficia di otro aumento. “Cualkier caminda cu tin un espacio pa duna e aumento ey, nos tin cu hacie.”, segun e director di SVb.
Sr. Jacobs a bisa cu AOV ta bay keda e fuente di entrada mas importante pa e gran mayoria cu no tin un pension beneficioso. P’esey ta importante pa keda mantene pa e persona por sigui biba. E ta recorda cu e meta cu a bin cu AOV ta pa combati y preveni pobresa bou un grupo vulnerabel di comunidad cu ta nos hende grandi. Nan a drenta den un fase den bida cu fisicamente nan no ta den condicion mas pa traha pa nan mes pa genera entrada.
