Recientemente, minister di Energia, Glenbert Croes a emiti un comunicado di prensa den cual a sigura cu ta bay cuminsa cu e proyecto di LNG hunto cu e compania Eagle LNG “pronto.” Esaki a causa controversia, cu usuarionan di rednan social criticando e aparente secresia rond di e proyecto aki.

Dialuna ultimo den un comunicado di prensa, minister Glenbert Croes a anuncia “cu hopi alegria” cu gobierno hunto cu Eagle LNG a defini un “roadmap” pa continuacion di e proyecto di LNG.

“E inversion cu Eagle LNG ta bay haci pa logra trece gas natural na Aruba pa wordo procesa y

suministra ta uno hopi grandi,” segun e comunicado. “Unabes logra esaki, e impacto riba e tarifa di awa y coriente lo ta uno significante, di cual hunto cu proteccion di e medio ambiente ta un di e metanan principal di Gobierno. Obviamente, e deseo di Gobierno ta pa cuminsa lo mas pronto posibel cu e proyecto, pero esaki lo wordo defini den e proximo simannan.”

Advertencia di TNO

Den un rapport comisiona pa minister di Asunto Economico y Clima di Hulanda, TNO a adverti cu e sostenebilidad continuo di e produccion di electricidad na Aruba ta limita pa e contract firma pa LNG. Nan ta resalta cu tin poco informacion publico tocante e acuerdo di suministro di LNG.

Di e entrevistanan cu nan a realisa, nan a compronde cu tin un acuerdo di ‘take-or-pay’ pa un cantidad di LNG cu ta cubri mas o menos 50% di e produccion di electricidad y cu e contract tin un duracion di 20 aña. Esaki ta nifica cu te 2046 of 2047 lo tin costo adicional pa aumenta e porcion di electricidad renobabel mas halto cu 50%, debi na cu e LNG lo mester wordo paga mescos si e consumo ta baha.

Reaccion di comunidad
 Riba rednan social, usuarionan a expresa critica tocante e acuerdo cu Eagle LNG.

“Ki mishi ta actuando den secresia asina aki? Ki mishi cu barionan afecta no mag haya sa kico ta spera nan?” un usuario a comenta riba Facebook. “Actonan asina aki ta contra transparencia y contra etica, pa no papia mes di bon gobernacion. Unda tur e palabranan di bon gobernacion y transparencia a keda? Con un Minister ta nenga di contesta pregunta di habitantenan preocupa y ta “shake hands” cu un compania cu tin TUR e cartanan den man pasobra supuestamente NI e Minister sa kico ta den contract? Nan por hasta dicidi pa destrui barionan cu bendicion di Gobierno, di [minister Glenbert Croes] y Parlamento pasobra “nos no sa kico ta den contract.” Tin beneficio personal?”

Otronan a cuestiona unda tin pensa di pone e tubo den cual e LNG lo pasa.

“Y cual lo ta e trayecto di e tubonan?? No memey di nos casnan. Spera haci lo corecto y pone e planta pabao di WEB manera e plan original ta. Stabilidad y prosperidad no por bay acosta di nos trankilidad. Wardando ainda riba contesta aki cual lo ta e ruta di e tubonan!” un usuario a comenta.

Finalmente, e usuario a conclui: “Nos ta exigi transparencia! Too much to ask?”