Ayera, mediante un comunicado di prensa, minister demisionario di Turismo, Dangui Oduber a informa cu “pronto e destaho publico pa construccion di restaurant Baby Beach lo bay na vigor. E proyecto di restaurant aki ta forma parti di e masterplan di Sero Colorado.”
Segun e comunicado, “despues di un periodo largo di preparacion y ehecucion, e masterplan aki ta drentando su fase final. E masterplan aki a wordo reparti den diferente fasenan, manera por ehempel e restauracion di e trapi nan na Rodgers y Baby Beach, Realocacion di e turtle wall, restructuracion di Rodgers Beach su parkeo, Baby Beach su parkeo, construccion di un “trafohuis” nobo, renobacion di e dos canchanan deportivo di tennis na Baby Beach, y awo e construccion di e restaurant na Baby Beach, cual ta situa entre e dos canchanan di tennis.”
“E destaho publico pa construccion di e restaurant lo bay cuminsa dentro di poco pa asina e construccion tambe di e restaurant por cuminsa y wordo finalisa e aña venidero,” e comunicado ta continua. Unabes e canchanan deportivo di tennis y e restaurant wordo entrega e masterplan di e Proyecto di Baby Beach lo keda cristalisa.”
Sinembargo, e anuncio a ricibi algun critica den comunidad.
Riba rednan social, usuarionan a cuestiona pakico mester di otro restaurant na Baby Beach.
“Pakico ta traha un otro restaurant si tin dos caba cu a pasa den bon y malo pa keda habri??,” usuario J.W. a comenta riba e pagina di Facebook di e minister. “Mi ta [haya] e di 3 restaurant un sla duro pa e dosnan cu ya t’ey caba! Tabata mas na su lugar di sigui duna fair chance pa e dosnan por sobrevivi en vez di bin cu un mas cu sigur lo bay perhudica nan seriamente!! Jammer!”
Igualmente, J.B. a indica cu echt no mester otro restaurant. “Tin 2 caba cu ta masha bon eynan! Mester cuminsa [inverti] den otro cosnan MAS importante. Drecha caminda den mal estado” por ehemplo.
Finalmente, segun I.H. mester mas claridad riba e decision pa construi un restaurant. “Wel esaki mester un splicacion mihor. Tin dos restaurant cerca di otro, tin mas pafor di Sero Colorado y Den Stadium di SN.
Why more eynan mes na Baby Beach? Boso ta lubida cu Localnan ta kedando sin suficiente lugar pa pasa dushi momentonan na Baby Beach. Sigur e dos ultimo planning aki di Sr. Dangui ta innecesario. Nan ta di mas.”
E minister no a reacciona riba e comentarionan aki.
