ORANJESTAD – Ayera, sin mucho ceremonia, DVG a anuncia cu e localidad di Servicio Veterinario conoci como ‘kill cage’ lo cera ‘temporalmente pa renobacion y mehoracion di su servicio’. E anuncio sinembargo a lanta un cantidad di reaccion riba rednan social, mirando cu e ‘kill cage’ pa hopi aña ta keda controversial.

Segun DVG, “Den pasado e localidad aki tabata habri pa publico 24 ora pa dia 7 dia pa siman. Esaki pa evita cu ta tira animalnan over di muraya, loke den pasado a sosode. Cu e renobacion aki lo bay construi un dak pa e localidad y tambe lo bay introduci dia y orarionan stipula pa por trece of busca animal.”

E ‘kill cage’ ta keda un problema constante den sociedad Arubano, cu di un banda ta wordo mira como necesario, pero di otro banda como un crueldad. Aña pasa januari, Bon Dia Aruba a publica un articulo unda ciudadanonan tabata conta cu nan a mira maltrato pisa di bestia tumando luga na e ‘kill cage’.  “Honestamente mi a kere cu nan tabata pone nan drumi cu hangua. No bati y spart nan for di otro?”, un di nan a expresa. Sinembargo, e anuncio di DVG no ta haci mencion algun si lo mehora e trato di e animalnan cu ta termina cerca nan. Actualmente e animalnan ta keda sin awa, sin cuminda y bou solo, wardando na ‘kill cage’ pa wordo mata cruelmente.

Un grupo grandi riba rednan social a expresa deseo pa mantene e ‘kill cage’ cera definitivamente. Riba Facebook, usuario A.L. Vrolijk a comenta: “Kima e luga y traha un bunita cas cu cuido pa nos animalnan no desea.” Un mensahe cu ta resona cerca varios fundacion pa derechonan di bestia, manera Luna Foundation, cu den e dianan aki a ta preparando un ‘safe haven’ pa bestianan di caya por recupera despues di haya cria of kiebro di salud.

Sinembargo, e problema di abuso di animal na Aruba ta demasiado grandi pa soluciona cu un shelter. E mesun siman aki, varios fundacion local, entre nan Nine Lives Aruba, a haya nan mes confronta cu un cantidad enorme di animal den necesidad urgente di cuido, cual a cay hopi pisa riba nan. Nine Lives Aruba e siman aki mester a atende cu 14 pushi (adulto y kitten) den un solo dia. Y asina mes, cu e trabou incansabel di e boluntarionan di fundacion, nan no ta logra maneha e daño enorme y e maltrato contra nos animalnan. Pakico?

Pasobra e fundacionnan no a causa e problema, ta pueblo a causa e problema. Anualmente, dies mil animal ta wordo mata na ‘kill cage’. Ta cual fundacion lo por tuma dies mil animal cada aña? Principalmente puppy y kitten, cu tin ainda mas di dies aña di bida nan dilanti, ta cuanto animal mester biba den shelter na Aruba? Esaki ta un punto cu nos a trata durante un entrevista algun luna atras cu Zoey Conijn di Luna Foundation. El a splica con e ‘kill cage’ a nace di un necesidad den comunidad pa deshaci di animal no desea, cual antes nan tabata kima, hoga, y mata di tur forma cruel. Opinion di Zoey, y di hopi otro cu ta traha constantemente cu maltrato animal, ta cu nos comunidad mester bira responsabel pa su bestianan prome, y despues por cuminsa elimina e ‘kill cage’.

Cu of sin ‘kill cage’, e hecho ta keda cu hopi animal na Aruba ta maltrata y abusa di formanan horibel. Ta nos deber como sociedad pa educa nos mesun hendenan pa stima y proteha nos animalnan inocente.

Actualmente, e fundacionnan local ta preparando pa un campaña di sterilisacion. Crioyo Trappers ta un grupo cu ta enfoca principalmente riba sterilisacion di bestia riba caya, ya cu e accion aki ta uno cu por crea un impacto mas grandi riba e bestianan riba caya. Sterilisacion ta nifica reduccion di e poblacion di cacho y pushi riba caya. Durante campaña di sterilisacion, varios instancia ta colabora, y cu ayudo di donacion, ta sterilisa bestia di caya, y pa un suma chikito, tambe bestia di cas, pa asina reduci e cantidad di bestia no desea, cual despues ta termina na ‘kill cage’. Pues, pa evita cu den futuro mester hiba un cacho cu su puppies pa nan wordo mata, ta urgi comunidad pa participa den e campaña di sterilisacion, y preveni sufrimento animal.