Anuesca Baly, director di SKOA: ‘Ningun trahado di un fundacion por ta un ambtenaar’

Dialuna ultimo, minister di Enseñansa, Armando Lampe durante un conferencia di prensa di gobierno a pidi pa directiva di SKOA coregi e situacion cu a surgi cu un grupo di trahadonan cu a haya e status di ambtenaar ilegalmente.

Tocante esaki, Bon Dia Aruba a tuma contacto cu Anuesca Baly, director di Stichting Katholiek Onderwijs Aruba (SKOA) y el a splica cu declaracionnan di Lampe no ta corecto. Esaki pa motibo cu ningun trahado di un fundacion, sea SKOA of cualkier otro por ta un ambtenaar; ambtenaar ta solamente e hende cu ta traha den servicio di gobierno. Den e caso aki SKOA ta un fundacion y no tin ningun personal cu ta ambtenaar.

Asina mes, el a expresa cu na prome luga, e trahadonan en cuestion ta gelijkgestelde. Di dos punto el a destaca cu minister tambe a menciona cu SKOA a actua contra ley y esey tampoco ta corecto, pa motibo cu nan ta traha cu un Ministeriele Beschikking (MB). Un orden cu ta wordo otorga door di un minister, ta wordo discuti pa Conseho di Minister, y cu esey a sosode den gobierno anterior. Nan ta discuti door di e situacion y nan ta duna aprobacion pa algo, esey ta e proceso.

“SKOA no tin poder pa bin cu autorisacion pa bisa cu kier bay papia cu minister y esey ta wordo aregla entre nos, absolutamente esey no ta e caso”, el a sigura.

Henter e proceso pa SKOA a cana manera mester ta y asina tambe decision a cay pa paga e trahadonan di limpiesa cu ta pertenece pa SKOA. Baly a declara cu e trahadonan ta wordo paga y subsidia door di gobierno. SKOA ta haya subsidio y nan ta duna pa Directie Onderwijs tur dato tur luna pa finanzas, loke tambe ta wordo controla pa finalmente nan por paga. Den esaki, el a expresa cu tin un proceso y nada ta wordo haci contra ley.

El a specifica tambe cu nan a haya un carta dia 19 di december di ministerio di Enseñansa y 8 di januari nan a duna di conoce pa minister, via di nan abogado, cu SKOA no ta di acuerdo cu e decision.

Di mesun manera, Baly a menciona cu diaranson ultimo nan a haci un reunion cu tur trahado, incluyendo cabesantenan y trahadonan di limpiesa, pa duna nan un splicacion; pero na mesun momento pa haya autorisacion di nan, pa motibo cu SKOA lo sigui e proceso aki pero mas largo.

Den su opinion, el a comenta cu nan no ta haya corecto cu despues cu desde 2015 nan ta ricibiendo un cierto salario, aworaki mester bisa nan cu e extra pago cu nan ta haya no ta valido. Baly a sigura cu esey a wordo trata den Conseho di Minister, y minister Hooyboer-Winklaar a duna su aprobacion, pa motibo cu esey ta un continuacion di un gobierno.

“Bo no por bin y bisa cu mi ta bay kit’e pasobra e ta bay contra ley”, Baly a manifesta.

Asina mes, el a bisa cu e proceso lo bay cana ora nan a manda e proforma y nan lo manda un carta mas extenso, caminda cu lo duna di conoce cu nan no ta di acuerdo cu e decision cu minister ta tuma y si esey mester bay dilanti hues, nan lo bay tuma e caminda ey.

Tocante e trahadonan, Baly a expresa cu nan tur ta para tras di SKOA ora nan a haya e informacion. Nan tin confiansa cu SKOA lo para pa e derechonan di su trahadonan. Tambe Baly a bisa cu dia di e reunion a invita e sindicato TOPPA, pa motibo cu hopi di trahado ta pertenece na e sindicato aki y asina nan por ta na haltura di kico ta pasando y ni un hende por saca un conclusion eroneo.

“Di nos banda nos kier pa e informacion sali corectamente y loke minister Lampe a comenta cu e trahadonan di limpiesa di SKOA ta ambtenaar, esey no ta corecto. SKOA no tin autorisacion pa haci ningun hende ambtenaar”, el a destaca.

Pa finalisa, Baly a trece dilanti cu Lampe a menciona cu SKOA no ta desea pa tin igualdad. El a contesta cu e ta completamente di acuerdo cu Lampe, cu no mester tin desigualdad pa loke ta trata tur trahado di limpiesa den cualkier instancia.