Diahuebs presidente di Colombia, Juan Manuel Santo a informa cu su gobierno a nombra sr. Weildler Guerra como Gobernador encarga di Guajira.
Guerra ta un Antropologo di Guajira y ex Gerente di Banco di Republica na Riohacha y San Andres, kende semper a mantene un laso di amistad y intercambio cientifico y cultural cu Aruba.
Guerra a logra e donacion cu e pueblo indjan Wayuu a haci di un canoa tipico di nan na Museo Arkeologico di Aruba (MAA). Tambe el a yega di presenta su buki “El Mar Cimarrón”, cu ta compila e conocemento cu e indjan Wayuu sa riba nabegacion na Aruba mes. Igualmente el a intermedia pa banco central di Colombia por a bini cu un exposicion interesante riba e tradicion y rol di e “palabrero” den e cultura di e indjannan Wayuu di Guajira.
E nombramento di sr. Guerra ta yega na un momento clave, caminda presidente di Fundacion Rancho, sr. Clifford Rosa a firma recientemente un MoU na Colombia pa activa y fortalece e lasonan cultural y comercial bilateral entre Aruba y Guajira.
