Mike Tyson a anuncia plan pa trece su imperio di marihuana den Caribe cu un conferencia anual na Antigua den estilo di e conferencia di Foro Economico Mundial na Davos, Suiza.
E anterior campeon mundial peso pisa a topa cu prome ministro Gaston Browne recientemente pa discuti e plan pa un conferencia cuminsando na april 2020. Tyson ta un pionero den turismo di cannabis cu su Tyson Ranch na California, cu ta encera un hotel di luho y un cancha di golf pa su huespednan. Mike a bisa cu e kier pa Antigua y Barbuda bira un ‘powerhouse’ pa cannabis y a bisa prensa recientemente na Antigua cu ‘esaki lo ta bon pa e pais y lo trece fondo asina necesario pa yuda boso economia’.
Antigua y Barbuda ainda ta recuperando di e horcannan Irma y Maria na 2017, y ta conta cu recurso di turismo pa yuda reconstrui su comunidadanan.
Prome Ministro Browne a bisa, sinta banda di Mike: “ E conferencia lo ta manera ‘e Davos di cannabis’; e lo tuma lugar riba base anual y lo trece stakeholder di tur parti di mundo aki mes na Antigua pa discuti varios oportunidad den e industria aki.”
Un di Tyson su coleganan a bisa cu a scoge Antigua pa su hospitalidad, bunitesa, posicion y historia. E ex-boxeador ta propietario di Tyson Holistic Holdings, crea na 2016. Banda di traha e ranch, lo bay bende tambe tur tipo di producto deriva di cannabis.
Despues di analisa e oportunidadnan pa Antigua y Barbuda, lo traha un plan concreto entre Tyson y gobierno di e islanan.
