Entre e caos di un epidemia, esunnan cu ta sobrevivi un malesa manera COVID-19 tin den nan curpa e secreto di un respuesta immuun efectivo. Virologonan ta busca sobreviviente pa pistanan moleculer cu ta provee un ‘blueprint’ pa diseño di futuro tratamento of vacuna.

Investigadonan ta lansando estudio awo cu ta involucra e transfusion di componentenan di sanger di persona cu a recupera di COVID-19 na esunnan cu ta malo of den riesgo halto. Yama ‘convalescent-plasma therapy’, e tecnica aki por ta efectivo hasta sin cu dokter sa exactamente cua componente di e sanger por ta beneficioso.

E sistema immuun di sobreviviente di COVID-19 a haya un manera pa combati y derota e virus invasor SARS-CoV-2. Neutralisando anticurpa ta un forma di respuesta inmunologico. E anticurpanan aki ta proteina cu ta secreta pa celnan immuun yama B-lymphocytes na momento cu nan encontra un invasor, manera un virus. Anticurpa ta reconoce y pega proteina riba e superficie di particula di virus. Pa cada infeccion, sistema immuun ta diseña anticurpa cu ta specifico pa e pathogeno invasor particular.

Inmunisacion pasivo ta un proceso den cual anticurpa neutralisador di un individuo por ser usa pa protege of trata otro. Ademas di nan potencial rol preventivo, anticurpa neutralisador ta cuminsando di demostra su eficiencia den tratamentonan nobo pa malesa viral. Uso di nan poder protector tin su reto, principalmente pasobra ta dificil pa isola suficiente anticurpa pa ta efectivo.

Avancenan recien den tecnologia di medicina moleculer finalmente a permiti e sorto di aumento cu ta permiti investigadonan test e principio inmunologico.

Aña pasa, lo ta dificil pa pensa cu lo tin un necesidad enorme pa e strategia di inmunisacion pasivo.

Mientras e virus SARS-CoV-2 ta move rapidamente, cu casi 1 miyon infeccion confirma mundialmente, ciencia ta den un careda pa alcans’e.

Algun dia atras, un reporte publica pa cientificonan trahando na Shenzhen, China, a sugeri cu plasma – cu ta contene anticurpa – di sobrevivientenan di COVD-19 tabata exitoso pa trata cinco pashent criticamente enfermo. Pa fin di maart, FDA a aproba uso di plasma convalescente den tratamento di pashentnan severamente enfermo na Merca. Ademas, Mt. Sinai na New York a establece un colaboracion cu FDA y otro hospitalnan pa cuminsa estudio clinico pa cientificamente determina si e strategia aki di inmunisacion pasivo ta posibel.

Mientras e accion rapido pa evalua e tratamento nobo aki ta un momento pa celebra, e ciencia mester sigui avansa. Convalescent plasma, cu ta isola di sobrevivientenan recien recupera, tin demasiado tiki suministro pa por us’e ampliamente. E anticurpanan neutralisador mas potente mester wordo caracterisa rapidamente y despues produci eficientemente den gran cantidad.
Varios compania como tambe un cantidad di laboratorio academico tin como meta pa vence e reto di identifica y genera e anticurpanan neutralisador aki.

Na e vanguardia tin Regeneron, e compania farmaceutico cu a diseña tratamento efectivo pa Ebola. Maske combatiendo un virus nobo, nan strategia ta keda igual. Nan a isola y caracterisa anticurpa neutralisador y tin plan pa diseña un coctail di e moleculenan mas potente. E obhetivo viral di e anticurpanan aki ta e proteina ‘spike’ di SARS-CoV-2; e anticurpanan ta traha door di preveni e virus di drenta den celnan.

Tin estudionan clinico planea pa inicio di berano, esencialmante aki tres luna. Ta un velocidad tremendo pa e desaroyo di un herment asina sofistica pa intervencion.

Mientras Merca ta drenta e fase exponencial di transmision di COVID-19, e tratamento aki no por yega suficientemente lihe.