Diasabra atardi a yega un vuelo humanitario for di Hulanda, cu residentenan di Aruba y studiantenan. Como preparacion pa e proceduranan nobo cu lo drenta na vigor dia 1 di juli proximo, tur e pasaheronan a wordo invita pa boluntariamente test e proceduranan.
Prome Minister Evelyn Wever-Croes a duna di conoce den un comunicado di prensa cu e test run a bay hopi bon y por conclui cu Aruba ta cla pa reapertura.
E procedura ta inclui e registracion digital a traves di e ED card. Y test di Covid sea prome cu sali of na yegada.
Un total di 51 persona a haci test na aeropuerto di Aruba na yegada, pa personal di Hospital. Nan lo ricibi resultado di e test den 24 ora.
Cuarentena
Segun e comunicado, cada pasahero riba e vuelo aki mester keda den cuarentena te 1 di juli, hasta si e resultado di nan test ta negativo. E motibo ta cu e regla cu pasaheronan no mester bay den cuarentena si e test ta negativo ta drenta na vigor 1 juli.
Un pabien na tur e instancianan cu a traha hunto pa e test run tabata exitoso, Directie Luchtvaart, DVG, AAA, HOH, Inmigracion, Aduana. Aruba ta cla pa habri frontera diaranson awor 1 di juli, segun e comunicado ta finalisa.
