Alydia Wever, Ryan Oduber, Glenda Heyliger y Kevin Schuit, tur artista Arubano, a representa Aruba recien na e di 13 edicion di e Biennial di Havana cu e proyecto “Anthropical”. Un biennial ta un evento prestigioso unda artistanan internacional por presenta nan trabou pa un audiencia di rond mundo.

Anthropical como concepto tin mas cu 2 aña ta formando, asina sr. Oduber ta conta un publico di amante di arte antayera na Museo Arkeologico. E concepto ta uno cu cada artista ta refleha riba dje den su propio manera, pues cada artista a presenta un obra den forma di performance / instalacion a base di nan propio interpretacion di loke Anthropical ta nifica pa nan.

Cada artista a traha hunto cu bailarinnan, kende tambe ta Arubano, esta Kevin Gumbs, Eva Croes y Orwin Gomes riba nan obra cual tambe tabata graba pa e publico cu a acudi na museo por mira.

Concepto
Loke e concepto di Anthropical mes ta encera ta e relacionnan cu tin entre Reino Hulandes, specificamente e aspecto Europeo y con esaki a y ta interactua cu e aspecto Caribense.

Pues e raiznan di Aruba y su pueblo y con esaki ta informa e manera con nos ta biba awendia. E desaroyado di e concepto, sra. Wever, a splica durante un video graba den exterior, cu un di e inspiracionnan esencial ta bukinan skirbi pa Luc Alofs y Adi Martis, kende ambos ta historiado / antropologo.

Un di e videonan di e artista ta mustra un historia largo y rico di su antepasadonan, dunando cada nomber di antepasado su reconocemento, cual a conmove specialmente e audiencia di hende grandi cu a presenta na e anochi. Esaki ta trece den cuestion preguntanan manera, nos por conoce berdaderamente loke tabata antes? Y riba un nivel mas profundo, nos por compronde loke ta fuera di nos?

E performance di e artista Alydia Wever su so memey di kapstok scapando di un bisti blanco borda en particular tabata un imagen impactante. Den e performance e artista ta cuestiona ki rol e como muhe, pero tambe como artista tin den e mundo di awendia. Esaki reflexionando riba e historia di hende muhe den su famia, y e brain drain di artista como banco di conocemento cultural riba nos isla.

Biennial di Aruba no a bay door
Mira y presencia expresion di arte y cultura ta bay hunto cu reflexion y discusion di e interpretacionnan cu e arte a duna cada persona cu a presenci’e. Pues asina durante e anochi a refleha tambe riba e baloracion cu Aruba ta duna na su arte y artistanan. Un echo cu por refleha e realidad cu na Aruba no tin sosten pa arte, ta por ehempel e manera con a cancela Aruba su propio biennial pa via cu ‘gobierno no a sostene’, segun sra. Wever.

Esaki ta un realidad cu varios artista, incluyendo sra. Wever, sr. Oduber y sra. Heyliger ta experiencia, ademas anteriormente colega artistico Nelson Gonzalez tambe a comenta na Bon Dia riba esaki. “E ta un situacion unda ora nos bay afo na galeria of otro instituto di arte, nan ta trata nos manera rey, pero ora bo bin bek Aruba bo ta realisa cu no tin ningun respet pa artista contemporaneo. Mi ta spera cu den futuro e artistanan jong tambe por bay mas leu ainda cu nos pa demostra e importancia di un pais su conexion cu su artistanan.” Asina sra. Heyliger a comenta na Bon Dia.

Pero kico lo ta un Biennial su beneficio pa Aruba? Ana Maria Hernandez, kende ta un historiado di arte hoben, a splica durante un di e anochi su charlanan cu apart di e beneficio economico cu un mercado di turismo di arte lo trece na nos economia pero tambe pa e propio artista, tin un aspecto importante di por expresa e storia di un comunidad pa asina concretisa realidadnan di dia pa dia di nos isla.