For di algun luna pasa, representantenan di Fundacion Nos Aruba, Michael Williams y Jan de Ruijter ta treciendo dilanti denuncianan cu tin relacion cu e coalicion di partidonan MEP, POR y RED den gabinete Wever-Croes.

Durante un entrevista, Williams a expresa cu Aruba ta pasando den situacionnan dificil y ainda mas cu gobernantenan cu no ta concentra riba locual un gobierno mester haci. “Loke ta pasando na Aruba ta algo cu ta birando di malo pa pio” Williams a indica.

Di mesun manera el a señala cu oficina di abogado Wever-Croes-Ruiz ta forma parti di esaki y Gobierno ta sigui su curso pa motibo cu eleccion ta na caminda, ofreciendo hotel, condominio, entre otro, cu ta forma parti di patrimonio di e pueblo cu ta wordo bendi pa sponsornan, segun loke Williams a sigura.

Dialuna ultimo, na Corte di Husticia e caso sumario entama pa oficina di abogado Wever-Croes-Ruiz contra Fundacion Nos Aruba a bin dilanti pa via di acusacionnan cu a wordo haci contra nan, como tambe contra yiu homber di prome minister, Kevin Wever, cu tin di haci cu negoshi di Cannabis na Aruba.

Pa cu esaki, Williams a declara cu nan a trece dilanti pa hues loke nan tin, como tambe loke ta bay bin, pa motibo cu tin investigacionnan andando. Nan a presenta e pruebanan cu nan tin pa acusa e yiu homber y tata di prome minister Evelyn Wever-Croes.

Williams a informa cu hues a bisa cu e mester di mas evidencia, “pero esey ta trabao di hues.” Ademas, el a declara cu e caso aki no lo keda te aki y cu lo bay cune te na final.

Ayera mainta, oficina di abogado Wever-Croes-Ruiz a reacciona riba e caso aki pa trece e otro banda di medaya. Anthony Ruiz a trece dilanti cu Williams a acusa yiu homber di prome minister di ta negociando cu Americano riba e prijs y riba terenonan pa cultiva cannabis aki na Aruba; cu yiu di minister presidente ta sigura den un grabacion “bo por haya tereno, pero bo tin cu duna mi placa”.

Ruiz a informa cu Williams a afirma cu nan tin e grabacion aki como prueba di e acusacion. Tambe cu Fundacion Nos Aruba a informa cu nan tin mas grabacion di corupcion cu ta tumando luga cu minister presidente y su yiu homber involucra den negoshi di cannabis.

Ruiz a menciona cu Williams a presenta cuatro grabacion dilanti, na unda cu mester proba tur e ponencia ey, cu mester a mustra cu minister presidente y su yiu ta involucra den cualkier fraude y corupcion. Hues a tende tur grabacion y a puntra Williams si esey tabata e prueba cu e tin, pa despues señala cu e no tabatin prueba y cu esey no tabata e stem di e yiu di minister presidente.

“E ta bergonsoso pa bo mira con bo ta wordo confronta cu hechonan unda cu bo ta purba di atacha hende su nomber sin ningun prueba”, Ruiz a sigura.

Ruiz a comenta cu e manera con e caso aki a wordo treci dilanti sin ningun base y tambe cu a presenta supuesto pruebanan di politiconan di Hulanda cu ta papia riba corupcion na Aruba, cu e hues a bisa Williams cu e caso aki ta bay pa Kevin Wever.

Dia 29 di december e caso aki lo haya un sentencia, pa loke Ruiz a bisa cu e indicacion ta mustra cu nan lo tin e chens di gan’e. Ademas cu nan como oficina di abogado a cuestiona si e Fundacion Nos Aruba di berdad ta existi. Nan a duna Fundacion Nos Aruba te dialuna 14 di december pa demostra si e fundacion ta existi si of no.

Si acaso e no ta existi, Ruiz a declara cu hues a bisa nan caba cu e lo condena nan personalmente pa gasto di abogado, pa motibo cu nan no por sconde tras di un fundacion.

Ruiz a expresa cu tambe a presenta algun grabacion di nan oficina di abogado, cu a sali di trabaonan cu nan a haci pa companianan estatal, pero cu Ruiz no sa pa cua motibo e grabacionnan aki a bin dilanti, pa motibo cu nan no ta traha por nada.

“E punto ta cu e caso ta mahos, ta baho na ningun nivel y mi persona hasta a wordo menasa durante tratamento di e caso den corte y cu hues a haci anotacion di e menasa ey for di sr. Williams.” El a finalisa bisando cu esey ta den man di husticia.