FTA no a haya e derecho legal pa representa e trahadonan di Costa Linda, cual ta pone cu di acuerdo cu e maneho stipula y tambe ratifica pa sentencianan di hues, e sindicato of e dunado di trabao por pidi un referendum bek aki seis luna.
Segun Mediador di Gobierno, Anselmo Pontilius, e no ta regla den e ley, pero ta maneho cu mediador di gobierno a bay ta hibando y den un of dos sentencia di hues, el a wordo ratifica tambe cu e partidonan por pidi un referendum sigur despues di seis luna cu esaki a tuma luga. Logico si surgi un situacion di conflicto laboral na pia di trabao, loke a yega di pasa den otro empresanan den pasado, por haya e ora cu e partidonan mes ta dicidi cu si ta pa e motibo ey, por cambia di opinion y atende cu un referendum pa determina si mayoria di trahadonan sinembargo kier pa e organisacion di trahadonan representa.
Mediador no a scucha particular y a puntra tambe diaranson mainta. E referendum a cana den un forma mas normal cu ta posibel. E sindicato lo a informa mediador si nan lo tabata tin algun situacion iregular, segun mediador di gobierno.
Votacion
Despues cu FTA a solicita y a pidi pa e referendum, a procede manera ta e custumber di ley, segun mediador di Gobierno, Anselmo Pontilius. Tur e publicacionnan a bisa pa reuni cu e partidonan separa y percura pa tin un fecha estableci pa e referendum. Un total di 112 trahado por a haci uzo di nan derecho di voto, di cual den e referendum e ora mainta, di 8’or pa 9’or y mey, un total di 47 trahado a haci uzo di nan derecho di voto, di cual e sindicato a haya 44. Tabata tin 2 cu no a vota pa ningun sindicato y uno tabata nulo.
Den e cantidad di 112 aki di acuerdo cu ley, e sindicato lo mester haya 50 + 1 di e total di e trahadonan cu tin derecho di voto. Hopi biaha tin e confusion cu berdad e sindicato por representa e trahadonan, negosha un contracto colectivo, na momento cu el a haya mas di 90% di esunnan cu a bin vota diaranson mainta. Esey no ta e caso, segun mediador di gobierno, ya cu e sindicato mester a haya 57 of mas trahado, den e sentido si e por a negosha un contracto colectivo. A informa e partidonan di e resultado manera ley ta prescribi. Tin cu percura pa e proces-verbaal cerca e partidonan. Esey a bay diahuebs y den medionan di comunicacion ta haya e resultado akinan. En corto ta asina cu sindicato no a haya e derecho legal pa representa e trahadonan, den sentido cu e lo por a negosha un contracto colectivo cu nan condicionnan di trabao, segun Anselmo Pontilius.
Mester a pidi referendum pa departamento
El a sigui splica cu e sindicato tabata convenci cu no mester a pidi pa departamento, manera esun di Riu. Tabata tin referendum pa departamento y esey no tabata e caso. Nan tabata convenci y na momento cu nan a haci e peticion pa e referendum, nan por a proba cu formularionan cu nan tin e 50 plus 1 riba papel. Solamente cu nan no a logra. Diaranson, si nan a logra haya 10 pa 12 mas cu a vota, lo esey lo a supera e parti di 50 plus 1, pero esey no tabata e caso, mediador a splica.
