E situacion di Venezuela su compania estatal di petroleo PDVSA cu a yega di afecta e operacion den e refineria di Corsou. Pero tambe ta afecta e terminal petrolero di Bonaire Petroleum Corporation N.V. (BOPEC) cu PDVSA tin den e isla flamingo.
Sr. Anselmo Pontilius kende tambe fungi como Mediador y negociado den e islanan BES a señala cu recientemente a sali den prensa cu e trahadonan di BOPEC a bin cu un accion di protesta abierto.
E trahadonan riba caya a entrega carta na Gezaghebber y tambe nan a expresa su disgusto abierto. Esaki a haci cu como Mediador na Bonaire, el a keda envolvi den e asunto aki. Pero no ta e prome biaha, ya cu aña pasa tambe, Mediador di Gobierno a papia cu e sindicato y gerencia di BOPEC.
Un biaha e sindicato a solicita e Mediador pa mira unda por yuda. E problema ta uno grandi, pero como Mediador nan intermediacion ta keda limita. E unico cos cu Mediador por haci ta conseha e trahadonan pa medio di nan sindicato.
Actualmente tin 110 trahado ainda cu ta traha directo pa e compania BOPEC N.V. E ta haya cu e caso di BOPEC ta inevitabel caminda finalmente lo bay tin un desenlace y trahadonan lo bay haya e consecuencianan.
E terminal ta un propiedad di PDVSA pa 40 aña caba y e ta maneha pa e compania estatal di Venezuela. E grupo di trahadonan aki tin entre 20 pa 30 aña di servicio ta den un incertidumbre pa motibo cu nan no sa si nan lo cobra salario fin di juli awor.
Esey ta un di nan preocupacion principal. Te ainda e trahadonan aki ta cobrando nan salario. Pa motibo cu nan a cera un tipo di acuerdo entre Office of Foreign Assets Control (OFAC) y gobierno di Bonaire, entre otro pa atende cu e situacion di e trahadonan.
Igualmente tin un situacion caminda autoridad di Hulanda a señala cu pa luna di october no por tin niun tipo di almacenahe di azeta den e terminal aki pa percura di renoba e luga, sino mester cera e luga debi cu e ta deteriora.
Actualmente tin beslag poni riba e compania aki, entre otro di e refineria di Corsou (RDK) cu ta propiedad di pais Corsou. Pero tambe tin otro sortonan di embargo poni riba BOPEC pa motibo di e debenan grandi cu PDVSA tin actualmente. E riesgo ta -segun Pontilius- cu e compania por wordo declara den bancarota of bendi na findishi cu tur consecuencia pa e trahadonan.
BOPEC no ta un refineria manera nos ta conoce na Aruba of na Corsou. PDVSA tin un propiedad na Bonaire cu un cantidad di tanki di almacenahe di petroleo. E ta haya cu e ta un tremendo propiedad, pero lamentablemente durante e ultimo añanan e infrastructura aki a deteriora hopi cu tur su consecuencianan door di falta di inversion, manera a sucede den refineria di Aruba, Corsou, y otronan den Caribe.
