(CuraçaoChronicle) – Ayera mainta, Corte di Prome Instancia di Corsou a duna un veredicto den e proceso di responsabilidad di Banco Central di Corsou y Sint Maarten (CBCS) den nomber di Ennia contra e accionista y ex-directornan di Ennia.
E corte a duna veredicto na fabor di CBCS, y a duna orden pa Ansary, su yiu muher, y e ex-directornan paga Ennia mas di un biyon florin den daños. CBCS ta bay tene un conferencia di prensa awe diamars pa 5or di atardi tocante e veredicto en cuestion.
E compania di seguro a entama e caso contra doño Hushang Ansary y varios ex-director, director supervisor y accionistanan di Ennia. Pa motibo di mal maneho di anterior legislador- y accionistanan, ENNIA lo a sufri daños di al menos 700 miyon florin, segun e supervisor di Banco Central di Corsou y Sint Maarten. Abogadonan pa e compania di seguro a argumenta na october ultimo cu e daños lo ta mas halto ainda.
E compania di seguro ENNIA a exigi compensacion di 1.1 biyon florin den e proceduranan di responsabilidad contra Ansary y otro ex-directornan cu tabata a cargo di e compania rond di aña 2018.
E corte a determina cu despues di e adkisicion di ENNIA na 2006 tabatin un cambio den politica y den transaccionnan y den gasto, cual tabata hopi dañino pa e compania di seguro. E corte a tene e seis acusado responsable pa e dañonan sufri y a delinea un compensacion di mas di un biyon florin.
Riba potret: Biyonario Hushang Ansary.
