Dia 22 di maart ultimo den algun medio local a sali un anuncio di Ministerio di Husticia y Asuntonan Social den cual tabata anuncia cu entrante 23 di maart 2023 segun Ley di Molester, durante 30 dia lo tin oportunidad pa un y tur tuma conocemento na Departamento di Legislacion y Asunto Huridico di un peticion di permiso (hindervergunning) haci pa vuilstortplaats na Parkietenbos.

E mesun anuncio aki tabata indica cu den periodo aki, tur hende por expresa por escrito nan desacuerdo cu dunamento di permiso menciona y cu esey mester ta dirigi na minister di Husticia y Asunto Social mediante director di Departamento di Legislacion y Asunto Huridico.

Tocante esaki, Bon Dia Aruba a tuma contacto cu Anouk Balentina, ken ta un habitante di area di Parkietenbos y ta conoci den comunidad pa su lucha contra e dump y efectonan dañino cu esaki tin tanto pa salud di hende como pa medio ambiente.

Manera a bira conoci, dump di Parkietenbos mester a cera na januari di 2023 of Gobierno mester a haci’e legal, de lo contrario e ministernan envolvi por haya problema cu husticia, segun decision di HOF a indica dia 15 di augustus  den e zaaknummer 2022 HAR 32/2022.

Balentina a manda un carta na Ministerio Publico, na unda nan a bisa na HOF cu nan ta bay persigui e ministernan si no coregi e ilegalidadnan, pues sea ta cera e dump of haci esaki na forma cu ley ta prescribi.

Asina, dia 3 di januari 2023 Serlimar a coloca un borchi pafo di dump pa informa comunidad cu e dump ta cera. “Pero e realidad ta cu tur e pupu di RWZI ta bayendo eynan, locual ta trece hopi problema di musca pa nos. Esey ta wordo kima unda tin videonan di esaki riba Facebook y e huma ey preto ta plama den nos bario, den dje tin mercurio y otro cosnan peligroso. Incluso ora cu minister Arends a bisa cu no ta operando pasobra no tin filter den stock, nan tabata kimando sin e filternan necesario,” el a bisa.

Den e carta cu Balentina a manda na Ministerio Publico, el a señala cu luna di januari a pasa y e dump ta bisa cu ta cera pero e berdad ta cu ta habri. E incineador ta sacando huma preto y ta operando contra ley di Desaroyo Teritorial (Landsverordening Ruimtelijke Ontwikkeling, LRO) y su regulacionnan mediante di e Plan di Desaroyo Teritorial (ROPV)  articulo 25.2 sub C, ROPV. Pues a pesar cu e tin un permiso di molester pa e incinerador, e operacion y ubicacion ta contra ley, segun Balentina ta sigura.

“Si dump no wordo cera, nan tin cu haciele legal. Pero tanten cu incinerador ta operando e dump no a cera mientras nan ta sigui kima e pupu di RWZI y p’esey minister Arends a bay pidi un permiso pa legalisa. Den ROPV ta bisa cu specificamente na Parkietenbos no mag di tin afvalverwerking,” Balentina a bisa.

Violacionnan di leynan, entre otro Ley di Desaroyo Teritorial

ROPV ta existi for di 2021 y ta berdad cu dump ta existi prome cu esey. Pero na e momentonan aki no por saca un permiso, pa motibo cu esey ta contra e ley vigente. “Si bo kier bay haci esaki, bo ta actuando ilegal.”  Incluso articulo 30.11 ROPV ta stipula cu hasta situacionnan existente cu por causa molester of daño pa habitantenan of naturalesa y balornan di paisahe ta explicitamente prohibi. Cu esaki e operacion di e incinerador y e dump, incluso trabaonan pa sanea esaki, ta actonan ilegal cu Gobierno ta permitiendo dia aden y dia afo.

Di e carta aki dirigi na Ministerio Publico, Balentina a wordo informa cu nan a manda e carta na e officier di Medio Ambiente, pero te ainda e no a haya ni un contesta, loke a duna na Balentina e motibo pa tuma e decision pa hiba Ministerio Publico pa HOF un biaha mas. “Pasobra nan no kier persigui e ilegalidadnan aki, awor nan tin cu duna cuenta na HOF. Ytin tur indicacion cu e ilegalidadnan lo sigui,pasobra e peticion di permiso di molester no lo salvaguardia minister Arends di violacion di otro leynan y tratadonan internacional, entre otro, derechonan fundamental di e ser humano.”

Den e contenido di e peticion di e permiso aki tambe ta papia di cobamento y di afvalstort y no di saneamento,segun e poco informacion cu el a logra di skirbi di e documentonan inzage cu tin na DWZJ y cu el a solicita tambe a traves di un e-mail, mirando cu e ta un di e personanan afecta directamente door di e molester y contaminacion di Parkietenbos.

“For di e  descripcion bo no ta saca afo cu ta saneamento. Ora cu bo ta bay sanea un dump bo mester tene na cuenta cu varios cos, incluso cu polvo cu ta bay plama y cu ta toxico cu gas bao tera cu pa añanan tin asbest dera y antes nan no tabata controla, cu tin cosnan radiactivo tambe, y mester haci un investigacion di e suelo, pa wak te cuanto bo por coba y si bo por tap’e dependiendo di e gas y temperatura cu tin eybao. E investigacion mester wordo haci door di un compania cu varios certificacionnan di ISO manera den waste management (ISO 14001), ISO Medio Ambiente, calidad di aire, ISO den Salud como un PAHO of RIVM di Hulanda y independiente di gobierno, no cualkier laboratorio di Aruba sin experticio di cual gobierno por tin influencia riba esey,” Balentina a señala.

Gobierno tin obligacion pa proteha su ciudadanonan y tuma tur precaucion necesario. Tambe e ta un derecho fundamental hancra den tratado Europeo di Derechonan Humano cu cada ciudadano tin derecho pa haya informacion na tempo ora ta cuestionnan cu ta regarda riesgonan y peliger pa su salud (articulo 2 y 8 di EVRM.)

Locual ta di cuestiona y hustamente di e ministro cu tambe ta carga e cartera di Integridad ta dicon ta opta pa e bay splica personalmente tocante un permiso di molester pa Serlimar, si e ta bisa cu no tin metemento politico den Serlimar. Pakico no ta sigui e ley di molester y aplica e ley manera debe ser:

Articulo 2 di e Ley di Molester (hinderverordening) hustamente ta menciona cu mediante un decreto nacional (Landsbesluit Houdende Algemene Maatregelen van Bestuur) por apunta un establecimento cu ta cay bao di e ley di molester sin cu tin mester un permiso di molester pa esaki. E unico conclusion cu por saca di esaki ta cu si haci esaki via decreto nacional, esaki lo mester pasa via Raad van Advies. Eynan Raad van Advies lo cay di biaha ariba tur e obstaculo huridico y violacionnan cu no por permiti mas, incluso e manera con ta tratando cu e decision di saneamento.

“Al parecer e ministro tin hopi pura cune, mientras cu por haci un simpel buskeda den Google y lo sali na cla cu ora di sanea cualkier dump unda pa decadas desperdicio a wordo benta sin control, mester duna tempo di descanso na e tereno prome cu haci cualkier actividad manera cobamento. Haciendo esaki den pura por trece peliger y riesgo grandi pa e habitantenan di e vecindario. Obviamente tin otro interesnan den wega,” el a sigura.

Locual tambe remarcabel, segun Balentina a afirma, ta cu Parlamento ta hopi keto den e asunto aki. “E siman aki lo sali un carta pa parlamento den su totalidad, ya cu parlamento tin e tarea di controla gobierno y por señala cu en particular e miembronan di coalicion cu ta forma e mayoria tambe keto riba e tema aki, mientras e violacionnan di ley ta regarda nan ministronan.”

Minister Arends ta organisando un reunion informativo tocante maneho di desperdicio y e permiso di molester aki di Parkietenbos, cu lo tuma luga diabierna awor dia 14 di april 2023, na Compleho Deportivo Simeon Antonio for di 5.30 te cu 6.30 di atardi, un siman prome cu e deadline pa entrega e bezwaar.

E pregunta cu ta surgi ta cu si no tin metemento politico den Serlimar, ta pakico e minister tin cu bay splica riba un permiso cu ni a wordo otorga ainda, of acaso e ta un done deal caba? Pakico no ta e minister encarga cu e permiso di molester ta haci esaki, esta Minister di Husticia, Rocco Tjon? Ta preguntanan cu Balentina ta haci como ki compania ta bay haci un investigacion? Ki certificacion nan tin? Kico ta e peligernan cu esaki ta trece cune? Con ta eligi nan pa haci e tareanan? Nan ta liga cu famia di ministernan? Solucionnan di reciclamento y kico ta bay haci cu e sushi cu ta bayendo eynan ainda? Pakico ta laga e incinerador den e mesun luga y ta sigui haci daño na habitantenan rond di area di Parkietenbos? Pakico esnan directamente afecta no a mira plan di saneamento ainda y tampoco investigacion di e suelo di instancianan certifica  manera RIVM of PAHO? Pakico no ta sigui e proceduranan di ley y no ta cumpliendo cu leynan?