Mediante un declaracion, e activista ambiental Anouk Balentina ta trece dilanti cu minister di Medio Ambiente Ursell Arends ta carece di transparencia y a exclui actornan importante den e conferencia “Earth Day”, cu a tuma luga dia 22 di april ultimo. Balentina no a haya autorisacion pa participa a pesar di diferente solicitud cu el a haci.

Den e conferencia aki, minister Arends a convoca un grupo di invitado, como por ehemplo, un delegacion stranhero incluyendo un hues di Ecuador pa informa cu su persona y colaboradornan ta trahando duro pa introduci derechonan di naturalesa den Constitucion y ta un tema cu den ultimo añanan a bin hayando atencion.

“Minister ta mantene apariencia di defende derechonan di naturalesa defendiendo nan den Constitucion di Aruba, pero e realidad ta cu su intencion ta parce mas enfoca pa logra beneficio politico en bes di protege naturalesa mes,” Balentina ta sigura.

Den e conferencia aki manera a menciona caba, a invita un grupo pa participa pero organisacionnan clave como Fundacion Aruba Rainbow Warriors, Fundacion Accion Ambiental Aruba y Anouk Balentina mes, ken tin añanan den un lucha tanto na Aruba como na exterior pa tin un medio ambiente limpi y conservacion di naturalesa. E dos fundacion aki mas Balentina mes cu ta expertonan den area a keda exclui y no a haya e derecho di participa.

“Integridad no ta keda den palabra so, mester demostra den loke ta haci. Integridad y inclusion ta bay hunto unda inclusion ta mustra transparencia den e proceso di tuma decisionnan y accionnan lo cual ta crucial pa sigura cu no tin agendanan scondi of conflictonan di interes cu por pone den peliger e integridad cu por afecta e proceso. Un bon gobernacion ta tuma na cuenta principionan y ta esforsa pa ta transparente y pa representa e interesnan di tur parti interesa cu comunicacion habri y honesto pa informacion por ta disponibel pa e partinan interesa. Esaki ta mustra confiansa den e proceso,” e ta señala.

Balentina ta considera cu e consagracion di e derechonan di naturalesa den Constitucion ta un eleccion politico y no un decision cu un base cientifico. Por lo tanto, ta importante pa ciudadanonan pero tambe miembronan di Parlamento di Aruba tira un bista critico na e motibonan politico tocante e derechonan aki den Constitucion y ki consecuencianan esaki ta bay tin.

Ecuador ta un pais eficiente den area aki y tambe tin e derechonan di naturalesa hancra den nan Constitucion, por ta un ehemplo pa mira si por implementa esaki na Aruba y si lo tin bentaha of desbentaha den beneficio di e isla “na unda e minister mester traha pa interes publico y no por publicidad y fama,” segun el a sigura.

Balentina ta menciona cu ora ta inclui e derechonan di naturalesa den constitucion, esaki ta bira un reconocemento maximo, cu naturalesa tin un balor inherente, cu tin un derecho independiente di existencia y preservacion di su integridad y di su funcion.

Den mesun linea tocante Ecuador, e derechonan di naturalesa hancra den Constitucion tin un forma di protege naturalesa, reforsa y enfatisa cu naturalesa tin un papel importante den sociedad.

Tambe tin un forma di cambia e vision tradicional di naturalesa y e origen di reconoce e derechonan tan fundamental como derecho di personanan. Sinembargo, e implementacion di e derechonan aki na Ecuador te ainda ta un desafio.

Ta importante pa reconoce cu no mester copia reglanan, y sigur no di Constitucion, sin tin consideracion adecua cu e cultura specifico, antecedentenan demografico y historico di e mesun comunidad. Parlamentarionan mester tene na cuenta e factornan aki y coopera cu hende local, partinan interesa y expertonan pa crea apoyo y desaroya regulacionnan mas adecua na e necesidadnan cu e comunidad mes ta destina.

Igualmente Balentina ta señala cu e “introduccion di derechonan di naturalesa den Constitucion no ta conduci automaticamente na un miho proteccion di naturalesa, ya cu si ta bay ta den e Constitucion no ta nifica cu ta bay tin un efecto inmediato.” Den Constitucion no tin reglanan di implementacion sino di intencion. E cumplimento di e intencion aki ta depende di e boluntad politico, su elaboracion y su aprobacion di parti di gobierno cu reglamentonan deriva.

Establece derechonan di naturalesa den Constitucion tambe por tin efectonan contrario. Por ehemplo, por duna luga na insiguridad huridico y conflictonan tocante interpretacion di e derechonan ey. Por ta dificil pa determina kico exactamente e derechonan aki ta implica y con nan ta usa

.

Tocante e sistema di “Derechonan di Naturalesa” cu minister kier haci igual cu Ecuador ora ta nombra un entidad independiente pa representa e interesnan di naturalesa di manera efectivo manera mester ta representa, ta bay ta un desafio grandi specialmente den un comunidad chikito “na unda naturalesa semper ta perde prome ora ta trata di nepotismo y placa” pa asina por eligi un entidad obhetivo y independiente cu ta dirigi pa representa e interesnan di naturalesa di un manera eficaz. Ademas si haya poco recursonan disponibel e entidad aki no por para riba su mes.

Un otro problema cu por surgi ta cu ora registra e derechonan di naturalesa esey por topa cu otro derechonan humano , como derecho di propiedad, derecho na desaroyo economico of derecho na un ambiente di bida saludabel: “ta importante pa tene na cuenta cu establece derechonan di naturalesa den Constitucion ta un concepto nobo y cu no ta existi hurisprudencia den Reino tocante su aplicacion practico. Ta rekeri un cautela mayor den elaboracion y adopcion di proteccion constitucional di naturalesa , pa normanan y reglanan tambe desaroya den cumplimento di normanan, convencion y un miho practica internacional pa garantisa nan efectividad,” Balentina ta expresa.

Derechonan di naturalesa tambe ta implica multa y no otro entrada pa fluho di caha di gobierno, sino un fondo pa naturalesa, pa organisacionnan por solicita fondonan pa proyectonan di proteccion di naturalesa sin cu mester di financiamento cu por duna oportunidad na faboritismo.

“E respet cu minister ta expresa pa naturalesa a traves di su iniciativa den realidad no ta existi. Cuanto procesonan pa violacion di ley di naturalesa tin? Kico a haci cu estado di degradacion di coralnan y mata di mangel cu ta protegi pa ley? A pone na disposicion recursonan y capacidadnan insuficiente pa supervision y ehecucion, pa protege naturalesa di un manera efectivo mester di medidanan amplio incluyendo ley, politica, supervision, control y aplicacion ora ta viola e derechonan di naturalesa.”

Pa finalisa, Balentina ta declara cu Aruba ta e di dos pais na mundo cu ta bay introduci e derechonan di naturalesa den su Constitucion, pa e motibo ey ta importante pa tene na cuenta cu e practica mayoria di biaha ta diferente cu e teoria.