A traves di un comunicado di prensa, e conocido activista Anouk Balentina, hurista di leynan y defensor di derechonan humano y medio ambiente, a expresa su opinion ariba e nombramento di Ombudsman di Aruba.
Den e comunicado Balentina ta cuestiona si cu e publicacion reciente di e vacatura pa Ombudsman di Aruba, ta pone e pregunta si pueblo di Aruba mester ta contento cu esaki. Si esaki ta un paso pa dilanti pa democracia y husticia, of si e ta pa contra e abuso di poder y submision di e pueblo?
El a splica cu un di e prome lesnan cu un persona ta siña como hurista di leynan di Aruba ta cu no por copia leynan di Hulanda of di otro paisnan den e Reino Hulandes pa Aruba sin mas.
El a remarca cu ta un hecho cu e situacion factual, cultura, tamaño, politica y forma di Parlamento ta diferencia fundamentalmente di e otro paisnan, di Hulanda y incluso di e bisiñanan Caribense.
“Den democracia e principio di checks and balances ta hunto na e centro. E Ombudsman mester hunga un papel crucial como un guardian independiente, liber di influencia politico,” Balentina a enfatisa.
El a remarca cu ora cu Parlamento a acepta e ley pa e Ombudsman, nan a lubida di tuma un punto esencial den consideracion y a scoge pa un sistema caminda un mayoria absoluto – mitar mas 1 – di Parlamento ta tuma e decision di ken ta bira Ombudsman. El a splica cu esey ta nifica ku solamente e coalicion gubernamental di MEP y RAIZ tin influencia y oposicion ta keda afo.
Balentina a indica cu hasta durante e tratamento di e ordenansa di Estado den Parlamento,
oposicion no tabatin un bos real. E partidonan gobernante, esta MEP y RAIZ a duna señal cla cu nan asentamento continuo entre nan mes locual a resulta den un cortamento di discusionnan real y desacuerdo di opinion, manera semper ta sucede.
El a subraya cu un mayoria cualifica (3/4) lo ta pa Aruba un sistema mas husto, caminda miembronan di oposicion tambe por tin un palabra na e nombramento di e Ombudsman.
Pero, el a agrega, esey no ta posibel den derechonan di estado pa e motibo cu na 2022 a trata di integra e nombramento di e Ombudsman den e Constitucion di Aruba, pa asina e nombramento di e Ombudsman por a bay dilanti cu un mayoria cualifica. Sinembargo, sinembargo coalicion a rechasa e proposicion aki.
El a enfatisa cu esaki ta un problema cu politicamente no tin un solucion. E unico solucion, el a menciona, ta acepta un nombramento for di exterior di politica door di un organisacion no politico. Of otro solucion ta un nombramento na nivel di Reino. Pero esakinan, el a resalta, ta utopia pa awor ainda.
“Awor mes, hende ta luchando na diferente frentenan pa nan derechonan: e lucha pa aire limpi cerca residentenan di dump di Parkietenbos, proteccion di naturalesa na Seroe Colorado, mantencion di e lama na Embassy Suites y e preocupacion di habitantenan di bario di e liña di gas LNG. Tur esaki ta mustra cu tin un falta di transparencia, mal gobernacion, abuso di poder, violacion di leynan pa e mesun gobierno y un gran falta di supervision y aplicacion di leynan,” el a remarca.
Balentina ta ratifica cu e situacion aki ta causa di e gobierno mes y cu e situacion ta mustra e necesidatd pa un Ombudsman imparcial, fuerte y husto cu por actua na nomber di e pueblo. “Ta un lucha moderno di David contra Goliath, caminda e hende por riesga di keda tranca entre dos fuego,” el a señala.
El a enfatisa cu aworaki e ta keda den man di pueblo pa sigui vigila y wak pa asina sigura cu e nombramento di e Ombudsman no ta solamente un acto simbolico, si no un stap berdadero pa un mihor responsabilidad, transparencia y proteccion di e derechonan di pueblo mes.
El a splica cu e comision di seleccion pa e futuro Ombudsman ta consisti di hende respeta manera e Presidente di Hof van Justitie, presidente di Raad van Advies y presidente di Algemene Rekenkamer.
Balentina ta recomenda pa pueblo por tin informacion y conocemento di e recomendacion cu e
Comision di seleccion ta duna na Parlamento di Aruba pa asina nan por controla si e escogencia di ken lo bira e Ombudsman ta conforme cu e recomendacion. Pero, probablemente esey no lo sucede pa motibo di privacidad.
Por ultimo, el a agrega cu Parlamento no ta obliga pa sigui e recomendacion, locual, el a señala, ta laga pueblo cu un miedo cu e lo bira un escogencia politico. “Pueblo lo mester ta realmente cauteloso den e futuro proximo,” Balentina a finalisa.
