E siman aki Banco Central di Aruba a emiti su ‘Annual Statistical Digest’ pa 2018, cu ta duna un resumen hopi amplio di tur tipo di dato encuanto nos economia. Un motibo pa tira un bista mesora riba e indicadornan mas importante pa por averigua unda nos ta para te fin di aña pasa.
Crecemento economico general
Banco a adapta su cifranan di Producto Interno Bruto (PIB;GDP) segun e resultadonan di e investigacion di CBS encuanto e Cuentanan Nacional, cu a conoce un atraso bastante grandi, di manera cu recientemente CBS por a duna un update di e cifranan di GDP entre 2013 y 2017. Cu esey como herment Banco Central a haci un adaptacion di e cifranan preliminar cu Banco tabata maneha, pa falta di e cifranan definitivo, deriva di e cuentanan nacional. Esaki tabatin un prome consecuencia, cu nos GDP a resulta finalmente substancialmente mas halto den e añanan menciona.
Esaki tin naturalmente como consecuencia cu e corelacion debe publico/GDP ta cambia drasticamente, y no ta mas e cifra di alrededor di 85 – 86% sino segun CBA pa fin di 2018 74,8%. Naturalmente esaki no ta haci nos debe bira menos, pero e caminda pa yega na ‘tera firme’ den sentido financiero, loke ta na menos di 50% di Debe/GDP, a bira un poco mas cortico.
Ta bon pa tuma nota tambe di e tendencia inflacionario, cu ta refleha den e cifranan di GDP real. Aki por mira cu por ehemplo na 2017 tabatin un crecemento nominal di 3%, di cual a ‘resta’ 2% como porcentahe di aumento di GDP real, descontando inflacion. Contrario na esaki, na 2018 tabatin un crecemento hopi mas fuerte, di 4,8% nominal, cu pa motibo di e efecto inflacionario di e medidanan fiscal tuma a laga solamente un 0,9% di crecemento real di GDP.
Naturalmente ta keda pregunta si. Por ehemplo, cu segun e cifranan anterior tabatin un caida den crecemento economico na 2016, di -1,6% nominal, cu den e cifranan nobo ta resulta di ta un crecemento di 1,5%. Pa 2016 e cifra di desempleo segun departamento di Labor a keda na 7,7%, un poco mas halto cu 2015, cu tabata 7,3%. Loke ta mustra straño ta cu pa 2017, unda economia lo a bay dilanti fuerte cu 3% nominal, nos ta ripara cu desempleo lo a crece te na 8,9%. Despues, na 2018, esaki ta baha atrobe te na 7,3% loke si ta coresponde cu e crecemento economico fuerte di 4,8% nominal. Loke por conclui en todo caso ta cu desde 2013 te cu 2018 segun e cifranan nobo di GDP tabatin un crecemento gradual constante di GDP, aunke esaki no necesariamente ta coresponde cu e sentimento cu e ciudadano individual tin na ora di haci compra.
Loke ta sostene e tesis di menos empleo ta e cifranan di entrada di trahado di exterior na 2016 y 2017, cu tabata substancialmente mas abao cu na 2018, unda e aumento di mas trahado stranhero ta coresponde cu e aumento fuerte den actividad economico. Sin embargo, segun e cifranan aki di Banco Central 2017 tabata e aña cu crecemento mas fuerte di GDP, cu 3%, despues di e miho aña reciente, cu ta 2018 cu 4,8%. Y tuma na cuenta cu segun e cifranan nobo, 2016 tampoco tabata realmente malo, cu un crecemento nominal di 1,5%, ademas cu 2015 tabata bon mes, cu un crecemento di 5,5% nominal.
