Quota Club pa mas di 25 aña ta trata e campaña di earplug. Sra. Annemieke Dijkhout service commitment di Quota Club International Aruba kier pa tur hende sa cu porfin Quota Club ta haya oido pa e tema di cuido di oido. E tema di cuido di oido ta uno importante pasobra si un persona perde su oido esaki ta pa bida. Hopi hende no sa con esunnan cu ta sordo ta biba pasobra den pleno bista niun hende por mira ken ta sordo y ken no. Pero pa bisa un averahe di cuanto hende na Aruba ta sordo, Quota Club no tin e cifranan.
Pa hopi aña Quota Club ta parti earplug durante e paradanan di carnaval. E miembronan di e club a pensa cu esaki ta e miho manera pa e muchanan por haci uzo di esaki, pero nan a ripara cu esey no tabata yuda. Despues nan a dicidi di bende esaki na e suma di 1 florin, di cual ta un suma simbolico. Ta kere cu e suma aki casi tur hende por saca for di nan cartera pa proteha e oido di muchanan. E placa cu nan ta haya di e benta di e earplugs, nan ta percura pa pone esaki bek den comunidad y mas tanto na proyectonan pa hendenan cu tin problema caba cu oido of pa conscientisa tur hende mas riba e problema di oido.
No ta facil pa hende sordo den comunidad
Quota sa cu kico e ta pa un hende sordo mester funciona den comunidad y esaki no ta algo facil. Hendenan cu ta sordo tin hopi reto, p’esey e club di tur manera ta purba pa duna nan un sosten moral y si por tambe na un otro manera. Quota Club ta traha pa esunnan cu tin problema caba di oido tambe. E placa cu nan ta haya na e momentonan aki durante e paradanan di carnaval, ta wordo poni bek pa e hendenan aki pa asina nan haya un tiki mas miho bida. “Un hende sordo ta hopi isola,” segun Sra. Dijkhout. Esaki por wordo ripara den e bida diario, pasobra hendenan no por mira un persona sordo.
Un manera cu por mira si un hende ta sordo ta bin door di e aparato cu nan ta uza tras di nan horea. Pero un persona cu ta sordo y e no ta haci uzo di e aparato niun hende sa di esaki. Segun Sra. Dijkhout, un persona sordo tin un bida basta solitario. Kiermen mas tanto cu nan por, nan kier pa tur hende sa cu e oido ta masha importante pa funciona den un sociedad cu tin aki na Aruba.
Bende casi 17 mil earplug aña pasa
“Nos ta contento cu awendia tin mas y mas hende cu ta consciente, pasobra aña pasa nos a bende tur e stock,” el a bisa. Aña pasa nan tabata tin casi 17 mil earplug cu a wordo bendi y esaki a wordo uza. Durante e parada di diadomingo ultimo na San Nicolas, nan a ripara cu earplug a wordo uza pa asina e muchanan proteha na oido. “Nos palabra di tur e añanan, nos campaña di tur e añanan ta duna su fruta. Nos ta hopi contento cu nos tin WEB y Valero cu ta contribui cu nos tambe tur e añanan largo pa duna e sosten ey pa nos por tene hende consciente cu oido ta importante,” el a indica.
