Annelien Tromp-Diaz: ‘Bida ta duna nos tur e posibilidad di ta un miho hende tur dia’

Annelien Tromp-Diaz ta lider di Scouting Aruba. Bon Dia Aruba a acerca Annelien pa conoce mas tocante kico ta inspir’e, su logronan, retonan y su experiencia como hende muher influyente den nos comunidad.

Con bo ta balansa bo trabao cu bo bida personal?
Masha facil. Trabao, famia, hobby, etc tur tin nan mes box cerca mi. Mi ta atende cu nan manera mester ta, y semper mas balansa posibel. Ora mi ta na trabao, e focus ta trabao, ora mi ta na cas e enfoke ta mi famia. Si tin un emergencia, nos ta atende mes ora, y despues bay back pa e proceso normal.

Claro cu bon planning, organisacion y bon comunicacion tanto na cas como trabao, ta necesario y ta yuda.

Bo ta haya cu hende muher den bo profesion ta haya dificultad pa wordo promovi?

Mi no ta haya esey. Cada persona mester duna e maximo di su mes constantemente, e mester percura pa e empodera su mes, y si e ta sinti cu e posibilidad t’ey y e ta interesa den dje, e ta sea aplica pa e posicion, of vocifera su interes pa un promocion.

Como ser femenino kico tawata e obstaculo mas significante den bo carera?

Mi no ta kere cu tabatin dificultad pasobra mi ta un ser femenino. Tur trabao tin su complexidad, pa tanto hende muhe como hende homber, algun mas cu otro, y nada mester wordo considera como un obstaculo. Mas bien nos ta topa cu retonan den nos carera. Pero nos mester haci lo posibel pa vence esakinan, siña di nan, y sigui. Ta e retonan ta haci nos trabao mas interesante afterall.

Ken ta inspira bo y dicon?

Eigenlijk mi no tin echt un persona cu ta inspira mi. Mas bien situacionnan por inspira mi mas lihe. Ora cu como un team, nos logra nos metanan, of nos yuda otro personanan sea cu un servicio, of un persona den necesidad.

Ora mi lesa of mira con personanan ta yuda otronan den necesidad cu no ta per se un familiar, y ta haci esaki sin ningun interes, esey ta inspira mi sigur, pa ta un miho persona, pa mi duna un man na un otro den cualkier necesidad y asina ta un miho ciudadano.

Bida ta duna nos tur e posibilidad di ta un miho hende tur dia. No pa nos mes so, of pa nos estado financiero, pero pa nos comunidad.

Kico ta e conseho cu bo persona lo duna na e siguiente generacion di mucha muhenan lider

Semper kere den nan mes, y den nan potencial, keda enfoca, no bira egocentrico. Reconoce nan areanan mas debil, y traha riba esakinan. Sea pro activo. Sea humilde y fuerte alabes. Presenta bo mes. Durf tuma un risico. Sa cu como hende muhe nan por logra nan metanan, igual cu cualkier otro, trahando duro y kedando positivo. Y nunca pusha un otro abao, pa bo mes bay dilanti.

Bo a yega di experiencia resistencia ora cu bo a lidera un grupo di hende homber?

No nunca. Semper ma traha cu hende homber, y pa mi e ta mescos cu bo traha cu hende muher. Semper nos mester duna respet y nos lo ricibi respet back. Semper tin open communication, traha un base fuerte di confianza. y purba di lidera pa ehempel.

Mi mama tabata manager di un hardware store grandi pa hopi aña, den añanan 70 y 80, y trahando cu hende homber so, den un mundo di hende homber, y nunca e tabatin problema cu esaki, pasobra semper el a respeta nan cada un pa ken nan ta y pa kico nan sa. Y mi ta kere cu mi a sigui su pasonan.

Kico ta bo conseho pa e hende muhe hoben drentando den un profesion lidera pa hende homber?

Tene confianza y fe den bo mes, y mustra cu bo ta sigur di bo mes. Mantene curashi. Mustra compromiso. Pensa y mustra e actitud “Mi POR” semper y sea creativo ora mester. Y ora mester pidi ayudo of conseho, haci esaki tambe.

Unda nan lo por haya bo riba un diasabra 10or di mainta?

Normalmente mi lo ta bezig sea na nos clubhuis Savaneta of na Felipe B tromp School na Noord, despues cu m’a caba di haci mi trabaonan na cas of den mi hardin, preparando pa nos encuentronan di nos mucha muhenan den padvinderij cu ta tuma lugar merdia na Savaneta, y atardi na Noord.

Na Savaneta nos grupo ta conta cu 50 mucha muhernan di 4-17 aña y na Noord 75. Hunto cu nos lidernan femenino grandi y esnan jong, nos ta guia nos muchanan pa nan ta miho hende mañan y pa nan ta lider nan den cualkier situacion y semper kere den nan mes. Mi ta kere masha hopi den e forsa di padvinderij!

Y mi ta kere hopi den trabao boluntario pa un miho Aruba. Segun mi cu nos cada un tin e deber pa duna back na nos comunidad den trabao boluntario. Y kere mi cu no ta nada dificil. Tin asina hopi area cu mester di ayudo boluntario. Un of dos ora pa siman, no ta mucho, pero ta yuda hopi si. Y e satisfaccion cu bo ta haya, ta simplemente fantastico.