Dianan pasa, ex-minister Candelario Ambrosio ‘Booshi’ Wever a trece dilanti un biaha mas su disgusto pa via di e denuncianan cu el a haci desde basta tempo pasa contra otro ex-minister pa loke ta trata e maneho di Serlimar y su posibel bancarota.

Durante un entrevista cu Bon Dia Aruba a haci cu Anko Koopmans, actual director di compania Serlimar, a haci varios pregunta tocante e acusacionnan cu Candelario Ambrosio ‘Booshi’ Wever a haci riba un investigacion cu mester haci den e compania, su maneho actual y su posibel bancarota.

Den prome instante Koopmans a expresa cu e ta un persona apolitico y cu e ta traha pa bienestar di e compania Serlimar y pa Aruba en general. Ademas cu e no tabata al tanto di loke Wever a expresa den un entrevista, cu tin di haci cu un investigacion di e compania Serlimar.

Di mesun manera, Koopmans a trece dilanti: “Te ainda mi ta wak partidonan culpa otro pa cu Serlimar, jammer pasobra tur partido por a haci un tremendo trabao pa duna Serlimar e sosten cu e tabata merece e temponan ey. E por atacha mi persona, pero mi ta un profesional y mi a bini pa cambia Serlimar y purba salba Serlimar di un posibel bancarota. Si esey ta logra mi a gana mas cu mi posiblemente por a perde. Riesgo semper tin y esey mi a tene cuenta cune prome di tuma e encargo aki. Mi no ta bay hinca mi curpa den e bataya politico, pasobra esey ta perdemento di energia cu mi ta hinca den un “herstel” plan pa cu Serlimar.”

Ademas, el a informa cu te ainda Raad van Toezicht di Serlimar no a haci un investigacion interno tocante e acusacionnan aki.

Pa loke ta trata e acusacionnan cu siman pasa e parlamentario Hulandes, Andre Bosman a haci y a menciona publicamente den Tweede Kamer – cu muy pronto un ex-minister lo cay cera pa motibo di iregularidad den Serlimar – Koopmans a expresa cu esey ta e parlamentario su opinion. “Mi no por duna un opinion riba esaki, pa motibo cu mi no sa e detaye cu e persona por tin”, ademas “actualmente mi ta scucha cierto personanan cu ta papia den prensa, pero mi enfoke ta pa wak con nos pos salba Serlimar.” Asina mes, el a declara cu si mester bin un investigacion esey lo tende di e minister of di e Raad van Toezicht.

Como director di e compania aki, Koopmans a manifesta cu actualmente Serlimar no tin e fondo financiero pa sigui, y p’esey a puntra pa “surseance van betaling”. Di mesun manera, el a señala cu e mes no ta pensa hopi riba e acusacionnan, pa motibo cu e sa cu ta traha siguiendo e reglanan. “Mi ta integro y si mi ta wordo ‘forsa’ di no sigui e reglanan, mi lo tuma mi decision y busca un otro reto den mi carera profesional, tur hende sa esaki caba”, Koopmans a sigura.

Pa finalisa, Koopmans a bisa cu locual a pasa den pasado cu e compania, no ta bay yud’e awor (por ta siña di dje). “Si nos no pone tur hende den Serlimar nanishi den un direccion, no tin futuro pa Serlimar. Nos clientenan y full Aruba mester di Serlimar.”

Ademas a bisa cu e ta purba cu e team envolvi pa drecha cierto caminda den Serlimar, baha gasto, aumenta entrada y si tur cos ta bay bon, e tin speransa cu Serlimar por sali di e situacion precario aki.