Animal Care Clinic: Proyecto pa recauda fondo pa yuda Luna Foundation

Pa di tres aña caba, Animal Care Clinic ta organisa un proyecto pa mascota na Aruba, ‘dog wash’, pa famianan trece nan mascota pa ricibi un baño na e clinica, anto tur locual nan recauda ta bay pa yuda un fundacion.

Natalie Booi, veterinario di Animal Care Clinic, ta bisa cu e evento ta cuminsa awe 2or di atardi te cu 5or. Nan ta invita tur persona cu tin un cacho pa atende na e ‘dog wash’. E costo ta 10 florin pa cacho y tur e placa cu recauda lo bay pa Luna Foundation.

E team di e clinica, hunto cu varios boluntario di Luna Foundation, lo yuda den e evento. Booi ta splica cu aña pasa a recauda fondo pa Crijojo Trappers Aruba, cu a recauda mas di 1000 florin y tambe a tene banda di caminda un caha di donacion pa cualkier hende cu kier yuda por haci e suma mas grandi.

Animal Care Clinic tambe a tene un Dog Walk na juni, caminda Booi ta splica cu tabata un exito. Nan ta haci proyecto asina pa un bon causa y tambe pa ‘malcria tur mascota’. Esunnan cu trece atardi lo haya un ‘goody bag’ y lo tin ‘treats’ pa nan hamber cu ta importante’.

Sinembargo Booi ta bisa cu pa baña bestia no ta e unico cos importante, pero tambe pa e causa di yuda un fundacion cu ta haciendo algo bon pa comunidad y ‘nan merece’. Nan di clinica kier a tene dia 4 di october (ayera) cu tabata dia oficial di animal, pero a dicidi di tene awe, asina mas famia y hende por acerca cu nan mascota y dedica tempo na nan.

E ta bisa cu e por ta manera un spa treatment pa nan mascota. Booi ta agrega cu no solamente un baño pa nan mascota ta bon, pero pa cada doño pone atencion na nan mascota. Pa nan caricia, asina nan por wak di biaha ora tin purga of otro insecto cu ta afecta e salud di e mascota, ya cu ‘si no tin contacto no por ripara’. Anto ora ripara ta mucho laat.

Booi ta expresa cu no ta costa mucho tempo, anto esey ta algo cu mester haci tur dia. “E momento cu bo dun’e cuminda ta oportunidad pa bay riba rudia, caricia, pasa man na su cuero, horea, check wowo, su aliento. Tur esey tin cu haci.”

Tambe pa hende sa cu baña nan mascota tur dia of tur siman no ta bon. E ta splica cu no mas cu 2 bes pa luna, cu excepcion ora ta haci actividad cu awa. E mascota mester di su vet natural.