Diahuebs anochi, Sra. Marie-Therese Croes a fayece cu 87 aña di edad. E tabata viuda di e conocido comerciante den feliz memoria, Max Croes di ex Texas Furniture Store.
Sra. Marie-Therese Croes tabata un persona conoci den nos comunidad pa su obranan social y di caridad como miembro di Women’s Club of Aruba. El a yega di ricibi varios reconocimento muy specialmente den su lucha na defensa di e pashentnan di HIV/AIDS. Un di e reconocimento aki a wordo otorga pa e corant Bon Dia Aruba como Personahe di Aña na sra. Croes.
Tempo cu tabata existi un ignorancia y desconocimento rond di e virus di HIV, sra. Croes como presidente di Women’s Club of Aruba a introduci e capitulo aki pa kibra e discriminacion contra e victimanan di Aids. E tabata un berdadero angel pa nan, tempo cu e prome yiu di tera victima di Aids, Ruben Odor (d.f.m.) a forma parti di nan campaña di conscientisacion contra e taboe cu tabata existi rond di e topico aki.
Pa medio di Women’s Club of Aruba, sra. Croes a yuda construi un sociedad mas incluso, husto y humanitario pa e victimanan di Aids pa nan derechonan como sernan humano ta wordo respeta. Pero tambe el a bin cu campaña di prevencion entre otro riba uzo di condom pa evita cu e virus aki lo por a sigui plama den nos comunidad. Nos sentido condolencia na su famia, amigonan y conocinan.
