Parlamentario di e fraccion MEP y potencial minister di Finansa, Xiomara Maduro a presenta un panorama scur di e situacion di finansa publico cu e proximo gobierno di coalicion ta bay hereda for di gabinete Mike Eman I y II.

Di un banda un presupuesto 2017 cu na final di cuenta ta presenta un deficit di 50 miyon florin. Di otro banda, un presupuesto 2018 cu lo carga un deficit di 195 miyon florin. E datonan aki ta a base di informacion cu departamento di Finansa a pone na nan consideracion, kiermen datonan confiabel, segun sra. Maduro.

Ambos presupuestonan –segun e – no ta cumpli cu e reglanan stricto di supervision financiero cu Hulanda a bin cu ne pa medio di e colegio di supervision, esta CAft. Den sintesis pa sra. Maduro, pais Aruba ta na porta di un KB atrobe, si e gobierno nobo no ta negosha na tempo cu Hulanda e problema di nos finansa publico.

Situacion finansa publico
Sinembargo pa e minister saliente di e gobierno demisionario aki, Angel Bermudez, e situacion di nos finansa publico tin su retonan, pero e ta bayendo riba un miho rumbo cu antes. “E situacion no ta floria y esey nunca mi a trece dilanti. Semper ma bisa cu e situacion no ta di canta macamba. Pero mi ta kere si cu nos a logra di para e desaroyo negativo cu tabatin”, el a bisa.

Encuanto si e gobierno aki ta laga atras un desgracia financiero, sr. Bermudez a indica cu na 2014 ora cu el a drenta gobierno, e situacion no tabata mucho bon. E prome accion cu el a bin cu ne tabata para e debe nacional cu tabata creciendo durante e ultimo tres decadanan, locual nan a logra segun e mandatario.

E rapport di CAft ta mustra cu e debe nacional cu el a haya na 83%, no a aumenta durante e ultimo tres añanan. Tambe nan a cuminsa reduci e deficit presupuestario pa asina para e crecemento di e debe nacional. Esaki a base di e normanan cu a wordo introduci pa medio di e ley LAft (Landsverordening Aruba financieel toezicht). Aunke e ta admiti cu e nivel di finansa publico ta halto ainda, pero nan a determina e rumbo di finansa publico pa e no sigui aumenta. E no ta descarta cu den futuro e presupuesto di pais Aruba lo tin surplus, locual lo yuda reduci e debe nacional.

Tin diferente asunto pendiente prome cu e cambio di gobernacion lo tuma luga: Presupuesto supletorio 2017, prome concepto di presupuesto 2018 y cuenta anual 2016 cu ya caba ta den Contraloria General. El a splica cu e tardansa di e cuenta anual aki ta debi cu e secretario di e instancia aki a tuma su retiro y esaki ta trece cu e presentacion y aprobacion di parti di Contraloria lo tuma mas tempo di loke nan a premira.

E ta kere cu a cumpli cu e tarea asigna 3 aña pasa ora cu el a asumi e cartera aki. Esta di para e desaroyo di e deficit presupuestario. Den esey –segun sr. Bermudez- nan a logra cu e meta aki, mirando cu den 2015 y 2016 nan por a cumpli cu e reglanan di CAft. Encuanto 2017, e mandatario a indica cu ‘muy probabel’, tambe nan lo cumpli cu e normanan di supervision aki.

“Pero pa un cambio mas duradero bo mester tin mas y miho normanan cu ta duna bo tambe e flexibilidad pa bo por ehecuta un maneho riba finansa publico mas optimal,” segun sr. Bermudez. Tambe el a laga sa cu nos economia ta depende hopi di economia mundial, ya cu nos pilar economico ta turismo y esaki tin su efecto riba nos GDP.