Mediante varios post riba Facebook, anestesiologo Ike Posner a lamenta cu “Aruba ta perde un briyante strea di atencion medico.” Esaki pa motibo di retiro di specialista den oncologia ginecologico, Dr. Babet Latour-Lames.

“Como anestesiologo, mi tabatin e privilegio di traha den estrecho colaboracion cu Dr. Babet Latour-Lamers. Frecuentemente nos tabata traha te den oranan laat di anochi, banda di otro, pa scapa bida di mama y muchanan. Na momentonan asina critico, e esencia di un profesional ta bira cla, y esun di Dr. Babet tabata nada menos cu excepcional.

“Cu un carera impresionante cu a cuminsa na Erasmus MC y a abarca varios institucion di renombre, Dr. Babet a aporta un gran cantidad di conocemento y experiencia na Aruba. Su pasion pa oncologia ginegologico tabata evidente y su impulso pa hiba atencion medico di Aruba na e siguiente nivel tabata admirable.

“Sinembargo, su dedicacion na Aruba a bay hopi mas leu cu su carera profesional. Mama di cuatro yiu, el a manda su esposo Hulanda den busca di un miho futuro y tabata aspira na un bida sostenible na Aruba, cual e tabata considera su hogar. Tabata cla cu su curason a hinca raiz akinan,” Posner a conta.

Den su post, Posner ta destaca cu casa di Dr. Babet ta Vincent Latour, un medico forense di zeden politie pa menornan di edad na Aruba. Como unico medico forense, Aruba tambe ta perd’e.

“Por lo tanto, ta ainda mas doloroso pa sa cu el a haya su mes forsa pa bandona e isla pa motibo di atakenan personal y profesional.” Segun Posner, “no ta prome biaha cu mi ta tende cu nos profesionalnan ta ser maltrata pa directiva di HOH.”

“Perde un profesional asina talentoso y dedica, den un sistema di salud cu ya ta fragil, ta un golpi duro pa nos comunidad. Pa esnan di nos cu tabatin e privilegio di traha cu Dr. Babet, semper nos lo record’e como un pionero, mentor y sobre todo, amiga. El a laga un impresion duradero den tur esnan cu a crusa su caminda, y su legado lo perdura den bida di e sinfin di pashent cu el a salba.”

Ademas, Posner ta cuestiona e futuro di e cuido di oncologia ginecologico na Aruba despues di retiro di Dr. babet. “Cu retiro di Dr. Babet Latour-Lamers, specialista destaca den oncologia ginecologico, e pregunta ta bin dilanti, ‘kico awo?’ E experiencia y compromiso di Dr. Babet tabata crucial pa promove y supervisa e examennan di deteccion di e poblacion, specialmente esnan di baarmoederhalskanker na Aruba. Por lo tanto no por subestima e impacto di su partida.

“Investigacion di baarmoederhalskanker entre poblacion di Aruba ta fundamental. Deteccion trempan por scapa bida, y den hopi caso, e diagnostico oportuno ta garantisa cu e cancer aki por ta completamente tratable. Ademas, ta yuda reduci e gastonan di atencion medico a largo plaso. Sin un specialista manera Dr. Babet, e calidad di e estudio poblacional aki lo por ta comprometi. Ta existi e posibilidad cu lo tin retraso den screening of cu lo tin menos confiansa di poblacion den e proceso.”

Ademas di su critica, Posner ta ofrece algun sugerencia:
1. Periodo di transicion: E ekipo medico y autoridadnan competente lo mester traha hunto pa haya un solucion temporal pa continua cu e evaluacion di e poblacion durante e periodo di transicion aki.

2. Reemplaso: Maske por wel di ta dificil pa haya un persona di mesun caliber cu Dr. Babet, mester busca activamente un specialista di reemplaso.

3. Conscientisacion y educacion: Ta importante pa duna trankilidad y informacion na e poblacion tocante e importancia di deteccion periodico. E campañanan educativo por yuda restaura confiansa den e sistema.

Alabes, Posner a expresa critica pa e directiva di HOH den un otro post, bisando:
“E hunta di supervision ta comparti responsabilidad pa mal maneho na hospital. Si nan no eherce supervision adecuado riba e hunta ehecutivo, nan tambe tin un rol den e mal maneho. Si esaki ta pa motibo di indiferencia of incompetencia ta depende riba e circunstancianan specifico di e decisionnan dentro di e organisacion. E hecho cu Aruba ta bin sufriendo cu cuido ginecologico y obstetrico inadecua pa un periodo significante ta inaceptable.” E ta reitera su opinion cu HOH “ta core cu ginecologonan.”

Posner ta finalisa bisando cu e retiro di Dr. Babet ta sin duda un perdida pa Aruba, y ta expresa “profundo aprecio y respet na Dr. Babet Latour-Lamers. De hecho, Aruba a perde un profesional notable y nos lo haya su falta.”

Escasez den policlinica ginegologia
 E luna aki, Hospital Horacio Oduber (HOH) a traves di un comunicado di prensa a pidi comprension di comunidad, ya cu “ultimo tempo team di policlinica Ginecologia ta pasando den momentonan di escasez y awo e tin un efecto grandi riba e team completo y tambe riba cuido di pashent.”

“Siguridad di nos empleadonan ta hopi importante banda di cumpli cu nos vision como organisacion. Nos kier pa pashent haya e cuido cu nan merece pero no mester lubida pa keda cu respet mutuo,” HOH a bisa.

“Policlinica Ginecologia desde januari 2023 te cu fin di juni a mira no menos di 6289 pashent. Banda di consulta pashent, e specialistanan ta mira diariamente pashent admiti den Hospital. Y tur esaki ta wordo dirigi pa e team na bali di secretaria cu ta atende telefon y alabes ta contesta no menos di 200 mensahe via whatsapp pa dia. Un policlinica cu tin mester di mas Ginecologo cu diferente experticio awo ta haya nan mes den un situacion mas fastioso ainda cu tin consecuencia pa e pashent mirando cu pa algun luna no ta bay tin suficiente ginecologo pa atende tur pashent. Pues aworaki lo mester wak cua pashent tin cu wordo atendi cu emergencia y cua pashent por warda un rato mirando cu nan situacion ta uno di menos di urgencia. Un situacion no deseabel ni pa pashent y tampoco pa Hospital y policlinica Ginecologia.”

“Lamentablemente e escasez lo bira mas mirando cu e team di policlinica Ginecologia ta bisa ayo na dr. Babet Latour y dr. Susanne Thys, cu a scoge pa un reto nobo y alabes dr. Sietske Althuisius cu ta baha cu su pensioen bon mereci. Nos ta gradici nan pa tur loke nan a haci pa tur pashent y tambe pa nos Hospital y ta desea nan tur cos bon pa cu nan futuro. Pa sigui brinda cuido na tur pashent di policlinica Ginecologia lo t’ey pa nos pashentnan dr. Daphne Moreta y dr. Alejandro Garcia. E puestonan di ginecologo cu ta habri lo wordo yena temporalmente cu “waarnemers” te ora logra yena e vacaturanan cu tin habri a largo plaso. Pashentnan di ginecologonan dr. Moreta y dr. Garcia lo keda bou di nan cuido y tur otro pashent lo pasa algun luna bou di cuido di diferente “waarnemers”. Pues lamentablemente escogencia di ginecologo por lo pronto no lo ta posibel manera custumber.”

Bon Dia Aruba a tuma contacto cu PR di HOH, pero te ciere di redaccion no a ricibi un reaccion.