(AP) – Un corte na capital di Romania diahuebs a pone e influencer di internet Andrew Tate bao detencion na cas pa 30 dia, mientras fiscalnan ta investiga un caso nobo cu ta trata acusacion di contrabanda di menornan y relacion sexual cu un menor.
Bucharest Tribunal su decision ta bini un dia despues cu fiscalnan a detene 6 persona incluyendo Tate, di 37 aña y su ruman homber Tristan di 36, despues cu polis enmascara a haci un inval na 4 cas den Bucharest y Ilfov. Fiscalnan a pidi corte pa mantene e ruman hombernan den custodia pa 30 dia. Tristan a ser poni bao control hudicial, cual tipicamente ta trata restriccionnan geografico y reportando periodicamente na polis.
E ruman hombernan su vocero Mateea Perescu, a responde na e decision bisando cu e hues a nenga e fiscalnan su peticion a causa di e rumannan su “comportamento ehemplar” mientras cu anteriormente nan tabata bao medida di detencion preventivo den un caso separa, y nan ta firmemente nenga tur e acusacionnan contra nan y “ta keda constante den comproba nan inocencia.”
E rumannan Tate, kendenan ambos ta ex kickboxer y ciudadano dual Britanico y Mericano, y caba ta wardando huicio na Romania den un caso di contrabanda di ser humano cu dos hende muhe di Romania. Fiscalnan di Romania a formalmente acusa tur 4 aña pasa.
Den e caso nobo, Romania su agencia contra crimen organisa DIICOT a bisa cu e ta investigando acusacionnan di contrabanda humano, incluyendo menornan di edad, relacion sexual cu un menor di edad, forma un grupo di crimen organisa, labamento di placa y declaracionnan di influencia. E crimennan acusa a sosode entre 2014 pa 2024.
DIICOT a bisa cu e acusadonan a usa e metodo “loverboy” pa explota 34 victima vulnerabel cu a ser obliga produci material pornografico pa un tarifa online y cu e mas di 2.8 miyon dollar genera den ganashi a ser confisca y wanta pa e sospechosonan.
Un homber no nombra tambe a explota sexualmente un stranhero di 17 aña, DIICOT a acusa, a bisa cu el a keda cu 1.5 miyon dollar genera cu e actividad criminal. E mesun homber aki “den varios ocasion a tin relacion sexual y actonan sexual” cu un hoben di 15 aña segun e agencia ta acusa.
Pafo di corte despues cu e hues a entrega e ordo di detencion na cas, Andrew Tate a conta reporteronan cu hopi di e supuesto victimanan den e caso nobo tin declaracionnan den defensa di e hende homber. “Esaki ta un complot, e ta absolutamente fies y mi respet pa e hues cu a mira esaki y a laga nos den libertad,” el a bisa.
Andrew Tate, ken actualmente tin 9.9 miyon sigui riba e plataforma X, ta conoci pa expresa su punto di bista misogeno online y den varios ocasion a acusa cu e fiscalnan no tin evidencia den su contra y cu tin un conspiracion politico pa silencia su persona. Anteriormente el a ser prohibi di varios plataforma di red social pa punto di bista misogeno y mensahe di odio.
“Durante henter e proceso criminal, e personanan investiga ta beneficia di e derechonan di procedura y e garantianan cu e Codigo di Procedura Criminal ta provee, ademas di asumi nan inocencia,” DIICOT a bisa.
Durante e inval di polis riba diaranson, cual tambe ta involucra busca den e rumannan Tate su propiedad grandi alrededor di Bucharest, autoridadnan a confisca 16 vehiculo di luho, un motorbike, laptop, miles di dollar den cash, holoshinan di luho y drive di data.
E caso mas recien contra e rumannan ta agrega un litania di preocupacion legal contra nan.
Despues di e rumannan su detencion den december di 2022, nan a ser deteni pa 3 luna prome cu nan a ser cambia pa detencion na cas. Despues nan a ser restringi na Bucharest, despues Ifov y despues Romania.
Den apriil, Bucharest Tribunal a declara den e caso aki cu e fiscalnan su caso contra nan ta cumpli cu e criteria legal y cu un huicio por cuminsa pero no a pone e fecha pa esaki.
Luna pasa, un corte a retira un decision anterior cu ta permiti e rumannan sali for di e pais mientras nan ta warda corte. E corte anterior a declara dia 5 di juli cu nan por sali for di e pais siempre y cuando nan permanece den e Union Europeo. E decision aki tabata final.
Den maart, e rumannan tambe a presenta dilanti Bucharest Court of Appeal den un caso separa, despues cu e autoridadnan Britanico a emiti ordo di detencion a causa di acusacion di agresion sexual den un caso di Reino Uni cu ta for di aña 2012 pa 2015. E corte di apelacion a otorga e peticion pa extradita Tate pa Reino Uni, pero solamente despues cu e proceso legal na Romania a conclui.
