Diabierna ultimo, Alto Comisario di Cuerpo di Polis Aruba, Andrew Hoo a ofrece un declaracion tocante espacio nobo destina pa oficinanan di recherche di Cuerpo di Polis ubica na Wayaca.
Desde aña pasa a keda conoci cu edificio di departamento di recherche di Cuerpo di Polis di Aruba ubica na Frankrijkstraat tabata un luga no adecua pa su trahadonan pa via di contaminacion di beskem, algo cu no ta bon pa salud di niun hende.
Tocante esaki, Hoo a expresa cu e trabounan aki a cuminsa desde fin di aña pasa, na e momento cu a tuma decision pa saca tur e trahadonan di edificio anterior pa via di nan salud. Ademas el a comenta cu e edificio nobo na Wayaca ta hopi moderno y tin tur su aspecto di siguridad pa haci e trabou hudicial.
Di loke ta trata e trahadonan, e mayoria di nan ta trahando den oficina di Noord y Oranjestad cu cierto afspraak. Reaccionando riba e rumornan cu tin algun polis cu ta keda cas, Hoo a sigura cu esey no ta berdad.
Tocante e trabounan di edificio nobo, Hoo a splica cu te ainda e no por bisa den cuanto tempo mester ta cla, pa motibo cu esey ta den man di contratista y otro compania cu tambe tin aporte den e drechamento di e trabounan en cuestion. Asina mes el a bisa cu loke ta importante aki ta pa nan haya calidad y incidentenan no tuma luga atrobe, locual por costa mas placa.
Di mesun manera, Hoo a manifesta cu “loke nos kier logra ta pa fin di dia, nos kier un luga drechi, un luga cu e hendenan por traha aden pa duna un servicio na publico”.
Hoo a duna di conoce cu departamentonan cu lo bay ta ubica den edificio nobo ta Recherche di districto di Playa, atraco team, crimen organisa y otro departamentonan special cu e no a menciona.
