Diamars atardi, durante un conferencia di prensa di San Nicolas Business Association, a keda conoci cu ayera anochi nan a organisa e ‘Community Gathering’ unda a informa tocante e resultadonan di e 1st San Nicolas Business Summit.
Andres Hernandez, presidente di asociacion, a comenta cu esaki a tuma luga na Santa Teresita Center di San Nicolas y nan a trece dilanti informacion tocante e cumbre cu a tuma luga tres luna pasa y su resultadonan.
El a bisa cu Community Gathering tabatin un caminda basta largo, cu ainda nan ta riba dje y nan tin caba e resultadonan. No solamente plannan cu tin pa proyecto, sino cu e idea ta pa tin proyectonan cu por cuminsa den seis luna.
Di mesun manera, Hernandez a expresa cu tabatin e presentacion di proyectonan cu lo cuminsa den momentonan aki. Tambe a trece dilanti loke ta trata e Hotel Secrets di Baby Beach y tambe proyectonan cu ta referi pa plantacion di cannabis medicinal.
Tocante algun comerciantenan cu kier participa den e prome cumbre, pero cu nan no a haya chens, Hernandez a manifesta cu tabata dificil pa tur hende haya luga. Nan a pone publicamente cu si algun persona tabatin un proyecto cu ta cla, e por cuminsa den e proximo seis luna loke ta trata na San Nicolas of pariba di brug, esey tabata su oportunidad. Tambe a señala cu nan no por controla si un persona tabata laat cu esey.
E punto ta cu esey tabata e prome cumbre, manera Hernandez a expresa, y despues di esey lo tin ‘follow up’ den cual por haci riba cualkier otro proyecto. “Nos ta akinan pa yuda, tur persona, tur comerciante cu tin e interes pa traha algo pariba di brug”, el a sigura.
Di mesun manera, el a referi specialmente pa hende no presenta plan of ideanan. Mester presenta cu hecho, cu cosnan concreto cu por cuminsa move di biaha y por yuda otro. Tambe el a bisa cu un di e resultadonan di e prome cumbre ta cu a logra e prome Conseho di Minister den historia di Aruba cu a celebra dianan pasa na San Nicolas.
Tocante esaki, Hernandez a trece dilanti cu ta un luz pa nan, y esey lo bira mas grandi unicamente ora cu pueblo ta bon informa y cu pueblo ta para su tras. Ministernan a tende di e prome seis proyecto cu tabata andando. Durante e reunion aki, e ministernan a facilita y asina por a yuda e comerciantenan en cuestion pa realisa e proyecto y pa agilisa e desaroyo economico pariba di brug.
Relaciona cu esaki, el a comenta cu e comerciantenan a puntra y ministernan a tuma nota. Tur comerciante a presenta proyectonan concreto, cosnan cu por wordo resolvi hopi lihe y tabata hopi fructifero e reunion ey.
