Marisol Lopez Tromp mester keda lanta tur tegel cu tin, y unda cu por, entrega keho na Ministerio Publico. Esey ta e opinion di miembro di VVD y vocero pa e Comision Permanente pa Asuntonan di Reino den Tweede Kamer Andre Bosman. Bosman a haci e declaracion aki durante un programa radial cu e periodista Boneriano Zamir Ayubi.

Andre Bosman a sigui henter e desaroyo di e mocion di desconfianza contra e ex Minister di Aruba y despues con Conseho di Minister a vota pa retir’e bou di e capa di un ‘onverwerkbare situatie’. Den bista di Bosman, Prome Minister y Conseho di Minister mester a tuma e paso aki pasobra e mocion di desconfianza cu ta un medida hopi pisa, tabata invalido. “Mi no tabata sa cu spearfishing ta asina un pilar economico pa Aruba,” Bosman a comenta. “E ta mas cu obvio cu tin otro forsa tras di e decisionnan aki.” El a referi na ex Minister Otmar Oduber cu a pesar di a retira pa motibo di salud, a keda como consehero di Prome Minister Evelyn Wever Croes. “Pa mi, Serlimar ta hopi cerca di mi curazon. MI ta hopi enfoca riba dje. Mi ta hopi curioso con tur e investigacionnan di Ministerio Publico ta cana, pasobra ta ora cu ta bin claridad.”

Andre Bosman, kende den pasado tabata un persona hopi critico contra AVP, a bisa cu no por ta asina cu ta sigui malversa placa na Aruba, unda ta keda percura pa amigo y famia haya tereno y mas. Y e paso di Parlamento no a yuda, pasobra a pone e Presidente, mr. Juan Ady Thijsen fungi como un vocero di Parlamento, ‘cu e no ta’.

Locual a sosode cu Marisol Lopez Tromp ta mustra comosifuera cu e ex Minister a cuminza lanta tegel y a topa cu hopi sushedad y mas bien a haci tur lo posibel pa core cune, pa asina pura tapa locual Lopez Tromp a expone.

Ken ta gana placa cu prestamo caro?

E Parlamentario di VVD ta haya hopi straño con Prome Minister Evelyn Wever Croes, kende tin responsabilidadnan grandi caba ta bay tuma un petroleo asina pisa. “Mi ta preocupa. Locual mi ta mira cu ta poniendo presion pa purba regla cos, prome cu bin supervision di Hulanda.”

Den e mesun rosea, Bosman ta admiti si cu Aruba mester acepta e condicionnan si pa e sosten di likides cu ta e rijkswetten di supervision financiero y e entidad cu ta bay ehecuta e asina yama landenpakket. “Si Aruba acepta e ayudo, lo bin supervision. Nos mester wak hopi di cerca ken ta enrikese su mes riba custiya di e comunidad di Aruba. E ta hopi straño cu ta Hulanda mester haci esaki, pasobra Aruba tin su Parlamento y su propio Ministerio Publico. Pero tur cos ta mustra cu ningun por resisti e tipo di forsanan aki.”

E Parlamentario Hulandes ta haya dificil pa kere cu Parlamento di Aruba a accepta cu Gobierno a bay haci prestamo na un interes di cinco (5) porciento, mientras cu tabatin e oferta di Hulanda na cero (0) porciento. Ken tin suficiente placa pa, a costo di e pagado di belasting, logra cobra un interes cu ningun otro caminda e lo ricibi pa su placa, Bosman ta puntra su mes. “E interes aki ta uno na nivel di ‘woeker’ (usuario). Y Parlamento mester tabata rabia cu a scoge pa esaki, en bes di scoge pa e comunidad di Aruba.” Den su opinion, Parlamento mes ta permiti cu algun hende ta bay gana placa riba cabez di e Arubiano.

No tin diferencia AVP-MEP

Den su concepto, ta mustra cu no tin mucho diferencia entre e partidonan grandi di Aruba cu ta MEP y AVP. Tras di cada uno tin personanan cu hopi interes pa nan por sigui haya beneficio, entre otro terenonan. “Ami ta yama esaki un modelo di haci ganashi. Pues ta duna sosten na cierto politico pa haya beneficio despues, sea ta tereno, proyectonan turistico. Politica ta actua manera cu nan tin algo di bisa, pero no ta haci esey. Pa e banda ey, no tin diferencia entre e dos partidonan.

Hecho ta cu falta transparencia na Aruba. “Lo ta bon pa Minister Presidente habri e bukinan di Serlimar y tambe di DIP, y laga comunidad wak si en berdad Marisol Lopez Tromp tabata traha na su propio interes, of tabata purba drecha asunto.”

Resistencia pa supervision

Bosman a bisa cu e no tin problema si adapta e condicionnan, pero cu esencia si mester keda mescos. E supervision mester percura cu e perspectivanan pa e ciudadano di Aruba mehora. “Mi no ta compronde e problematica pa no acepta e landenpakket y traha hunto pa bienestar di e pais. Mas hende protesta contra e supervision, mas preocupacion mi ta haya pa locual lo por haya. Y obviamente tin cos pa haya, pasobra e resistencia ta enorme. Mi ta realmente spera cu Aruba por firma. E condicionnan t’ey pa nos sa unda e placa ta bay y con ta uze.”

Bosman a ripiti cu e placa cu Hulanda lo hinca na Aruba ta cuantioso y ta dirigi pa reforma economia di Aruba. Hulanda a haci sacrificionan grandi, a tuma pasonan cu a haci dolor pa por a logra un finanzas publico fuerte y cu a pone cu ta goza di e miho rating cu tin.

Placa gratis

Andre Bosman a bisa Bon Dia Aruba cu Aruba por haci locual e kier, pero mester realisa cu no ta existi placa gratis. Si no scohe pa firma cu Hulanda, e lo nifica cu Aruba mester bolbe fia, y paga interesnan halto. Mientrastanto tur instancia cu ta fia sa di e posicion di Aruba y e risiconan pa haci prestamo na Aruba. “ Nos tin ainda e CAFT, pero mi lo kier mira mas presion, pa na un forma bon, drecha e asunto na Aruba. A keda demostra cu den e ultimo 10 añanan, e no ta logra Gobiernonan pa logra esaki. Ni AVP ni MEP. E ta nifica cu nos mester yuda otro, pero a cambio di condicionnan si, pasobra si no, e lo sosode. Di e forma aki, Aruba lo por sali mas lihe for di e crisis, traha duro y bay dilanti.” Bosman a enfatisa cu Hulanda ta dispuesto pa yuda cu hopi placa. Bou condicionnan cu ta dirigi na garantisa recuperacion economico duradero, cu ta sigura cu aki 20, 30 aña tin un Aruba cu por sobrevivi. Esey ta e unico preocupacion cu nos tin for di Hulanda. Y mi no ta compronde e resistencia di dirigentenan di Aruba pa no bay de acuerdo cu e landenpakket.

Romantisa

E motibo cu ta bisa cu no mester romantisa e proposicion di Hulanda ta nada mas cu un grito pa no bin cu supervision riba friends and family, den opinion di Bosman. Si Aruba no por cumpli cu su obligacionnan, lo mester manda tur ambtenaar cas pasobra lo no por paga nan mas. E problema ta na Aruba y no ta di Hulanda. Hecho ta cu tin demasiado ambtenaar pa e entradanan di Aruba y ta algo cu Gobierno no ta papia di dje. Locual Bosman no a contesta ta si Hulanda lo por actua den caso cu na final Aruba no firma pa e dos rijkswetten y haya su mes cu problema pa paga, particularmente e debenan externo cu ta madura.

Pero, e ta convenci si, cu Aruba lo no sobrevivi cu e rumbo aki. “Na Aruba, nos a mira con a bay ‘feestvierend ten orde,’ pero nada no a cambia. Ainda ta sigui e mesun rumbo. Ainda ta tira placa afo.”