Bon Dia Aruba tabatin un entrevista cortico ayera cu parlamentario di Tweede Kamer pa VVD, Andre Bosman, encuanto su bista riba e situacion cu a surgi awor cu parlamento di Aruba practicamente a deshaci di e supervision di Reino cu cambio drastico di e ley cu ta reglamenta esaki (LAft).
Riba pregunta di Bon Dia kico lo ta e proximo paso cu posiblemente gobierno di Hulanda ta bay tuma, Bosman a contesta: “For di mi punto di bista como miembro di partido VVD, mi ta keda para riba, cu si Aruba no ta desea supervision mas, anto nos por laga e asunto asina, pero mi no ta kere cu nan ta yega asina leu. Pareu cu Hulanda kita su aprobacion, mi ta puntra mi mes unda nan ta bay haya placa fia, no di e institucionnan financiero confiable. Cu un debe publico di casi 90% y sin e apoyo di Reino e aventura ey no ta bay dura largo.”
“Si no tin supervision mas, loke ta bay pasa ta cu nan ta keda gasta placa, mescos cu e gobierno anterior tabata haci. Basicamente bo por bisa cu esaki ta manera ‘Gabinete Eman 3’. Nan ta haci promesa so, y di cumpli nada, mescos cu Eman tabata haci.
Pa Bosman pues no ta asina necesario pa bay den un siguiente formula di supervision, unda tin e alternativanan di un ley di Reino (Rijkswet) o un Algemene Maatregel van Rijksbestuur. “Mi no ta kere cu nos (Hulanda) lo mester bay tuma encargo di e maneho financiero di e isla aki, y di otro tampoco.”
Tambe Bosman a comenta brevemente tocante e situacion den Reino, unda su posicion ta bon conoci: por disolve Reino Hulandes y cada ken por bay nan caminda. Riba pregunta di Bon Dia cu hasta si e politiconan lo desea esey, nan probablemente no lo haya un mayoria vota pa sali di Reino, el a bisa: “Esey por ta berdad, pero ta pueblo ta sigui vota pa hende cu no por haci un bon trabao y ta keda hinca hende den problema. En todo caso, mi lo atende e asunto aki cu mi coleganan di Aruba den e proximo IPKO.”
