Durante rueda di prensa di diabierna 9 di juli, Minister di Husticia, Seguridad y Integracion, Andin Bikker, a toca e tema di maneho pa combati arma ilegal na nos isla, mirando cu actualmente tin hopi crimen ta pasando cu arma di candela na Aruba.

Minister Bikker ta splica cu na 2017, tempo cu el a asumi su trabao como minister di Husticia, e cifra alarmante di caso di atraco cu arma tabata 111, na aña 2018 a baha e cifra aki considerablemente na 34 caso registra y pa 2019 y 2020 e casonan no a surpasa un averahe di 45, y e ta sigura cu e aña aki e casonan di atraco ta bao control.

Ta conoci cu recientemente tin varios caso lamentabel y tragico, cu ta envolve arma di candela, a pasa den nos comunidad y e situacion a alarma minister Bikker.

Segun Bikker e maneho pa atende e topico pa combati arma ilegal no a cuminsa recientemente, e ta un topico cu “nos ta bin ta trahando riba dje di hopi tempo caba, pasobra arma no ta wordo fabrica na Aruba, arma ta drenta via frontera”, el a bisa.

Dia 4 di februari a firma cu Hulanda un protocol pa reforsa e fronteranan. Den e protocol aki tin diferente medida y diferente aparato cu lo busca pa yuda reforsa e fronteranan y combati e problema di arma ilegal na Aruba. Minister Bikker a detaya algun punto adicional cu lo tuma aworaki pa yuda cu e problema aki.

“Ta bay tin mas control y visibilidad pa un tempo indefini, dus ta bay tin hopi polis riba caya y lo haci uso tambe di e helicopter”, Bikker a bisa. “Pa locual ta trata control di nos frontera, nos a introduci e radar, manera mi a bisa awor ey, na Aruba no ta fabrica arma, ta via frontera nan ta drenta. E radar a yuda nos optimalisa e control na nos fronteranan, nos a introduci diferente ley pa nos tin mas autoridad adicional y tambe nos lo bay zet in e instrumento di registro preventivo, loke nos ta yama na Hulandes ‘preventief fouilleren’.”

Un aspecto tecnologico cu el a subraya cu e ta atendiendo actualmente y lo bay propone na conseho di minister y lo duna den e traspaso na su sucesor, ta un mobile scanner pa KPA. “Ora cu bo tin control di trafico lo bo por laga e autonan pasa den e mobile scanner aki, e ora automaticamente bo por detecta si tin arma riba e persona of den e auto”, el a agrega.

Minister Bikker a reuni cu San Nicolas Business Association y e asociacion a duna algun recomendacion pa yuda preveni crimen cu arma. E asociacion a recomenda pa tin mas patruya pariba di brug, nan a recomenda tambe pa haci mas uso di e aspirantnan di polis, y a recomenda tambe pa tin mas iluminacion den area di San Nicolas.

Minister Bikker ta splica cu prome cu e pandemia, a cuminsa cu un pedido pa “expression of interest, pa diferente area haya cameratoezicht”, y e ta sigura cu lo sigui cu e proceso aki pa asina instala camara moderno na diferente lugar, mas tanto e “hot spots”, caminda tin violencia frecuentemente.

Siguiendo cu e tema di camara, Fondo Desaroyo Aruba a inverti den un cantidad di camara di seguridad y monitor pa KPA, a puntra e Minister si e camaranan aki ta traha, si nan ta conecta na e monitornan y si tin plan pa expande e vigilancia tambe. Minister a responde: “Hopi di e camaranan aki nos a hereda nan tempo cu mi a drenta gobierno, nos a constata cu hopi di nan no tabata funcionando optimalmente, nos a haci un esfuerso enorme pa nos reactiva nan”. “Nos a constata tambe cu ora cu a bin cu Watty Vos Boulevard y Green Corridor hopi di e camaranan aki a cay for di servicio, fuera di esey nos a bin constata tambe cu door cu tecnologia ta avansa na un speed hopi halto, cu hopi di e camaranan a bira outdated”, el a agrega.

Minister tambe a ricibi e pregunta kico lo haci, riba lama, cu lo yuda reforsa e fronteranan maritimo pa combati entrada di arma ilegal y el a splica cu tin fondo, sumanan substancial, cu Kustwacht lo ricibi, te cu aña 2027, cu ta dirigi specificamente pa keda reemplasa nan equiponan, pa tin mas personal, mas training, y riba esaki tambe el a agrega cu a inaugura dos vehiculo sofistica, dos Raptor, pa warda nos costa.

Bon Dia Aruba a haci e intento di puntra, fuera di e tema di e maneho di arma, tocante e situacion di UTV cu tin andando pa hopi tempo caba na nos isla, pero Minister Bikker a prefera di no contesta e pregunta durante e rueda di prensa aki.