Cuminsamento di siman Camara di Comercio a manda un carta pa Alonso Tromp caminda basicamente a nenga di inscribi su peticion pa cambio di e directiva di Partido Democracia Real (PDR) den e registronan.

Lider di e partido Andin Bikker cu ta den conflicto cu sr. Tromp ta comenta: “Segun mi a compronde ta di basta dia caba lo a informa verbalmente na sr. Tromp cu Camara di Comercio no ta inclina pa bay over na inscribi e peticion pa cambio di directiva di PDR y cu e ta liber pa e bay corte a base di articulo 16, inciso 2, di e Handelsregisterverordening. Pa motibo cu ta sr. Tromp ta esun cu kier cambia e inscripcion actual na Camara di Comercio, ta na su persona pa cana e caminda pa corte, si e ta pensa cu e tin un caso. Ami no ta kere cu e tin un caso”.

Sr. Bikker ta lamenta cu tin un par di persona lo a cuestiona Camara di Comercio. “Nan mester compronde cu Camara di Comercio ta imparcial y ta haci su trabou di salvaguardia e registro.” En todo caso cu e decision di Camara di Comercio, e directiva actual y di semper di Democracia Real ta keda e unico directiva pues nada no a cambia. Sr. Bikker ta keda lider di e partido cu e a funda na 2004.

Lo ta bon pa sr. Tromp refleha un rato paso e no ta miembro di partido Democracia Real y no ta wordo identifica cu PDR, cual ta logico, segun sr. Bikker. E partido a wordo funda na 2004 pa Andin Bikker kende como unico lider a carga y crece e partido durante tres eleccion y lider’e ya pa casi 13 aňa, caminda cu sr. Tromp apenas a bin aparece te casi na ultimo momento riba lista na 2013. Desde di e eleccion aki el a retira for di politica activo. Pues un gran mayoria di persona ta opina cu si sr. Tromp kier sigui den politica e caminda ta habri pa e subi un otro lista of bay traha su propio cas pa medio di un partido nobo. Sr. Bikker ta splica: “Mescos cu a pasa den pasado ora cu por ehempel a funda MEP, ADN, RUBA y PDR, of e por hasta reactiva partido Aliansa.”

Comision di bon boluntad
Finalmente a remarca cu un grupo di amigo mutuo a propone pa explora si por habri dialogo pa medio di un comision di bon boluntad. Sr. Bikker a indica cu como personanan adulto y profesional e caminda di dialogo a base di buena fe mester por keda habri si tin disponibilidad pa cu esaki. E ta conclui cu: “Mi ta lamenta cu sr. Tromp a kies un caminda di discordia y ningun dia a tuma contacto cu mi persona, no obstante cu nos conoce otro di chikito y cu bispo di Pasco mi a yam’e invit’e pa nos reuni.”

Reaccion di Alonso Tromp
Bon Dia Aruba a comunica cu sr. Tromp y puntr’e su reaccion riba decision di Camara di Comercio anto si e ta pues bayendo corte. Sr. Tromp respectivamente a contesta cu e mester reuni cu abogado prome cu e por divulga algo. “Ami ta cana semper den margen di ley. Mi ta respeta nos leynan y statutonan a base di esey mi ta actua. Mi no ta cana papia mentira.” Pa locual ta e comision di bon boluntad cu sr. Bikker a trece pa dilanti, Bon Dia Aruba a puntra sr. Tromp riba esaki cual e ta bisa tambe e mester papia cu su abogado riba dje pa wak ki consecuencia e lo por tin.  “Nos ta semper positivo anto no tey pa perhudica ningun hende, nos t’ey pa defende e partido. Nos no kier pone e partido drumi, nan kier pone e partido drumi. Nos ta PDR, nos no ta POR,” sr. Tromp ta comenta.

Asina cu e directiva nobo ta inscribi na Camara di Comercio segun sr. Tromp: “E ta cana su caminda naturalmente di bay wak kico ta kico di e organisacion pa despues. Y naturalmente e ta  start e proceso pa sigui busca miembronan nobo y papia cu tur miembronan cu tabata riba lista. Nos si lo sigui crece e partido.”