Andin Bikker a asumi liderazgo di POR; Otmar Oduber ta sigui sostene y duna conseho na partido POR

Ayera mainta durante e controversial conferencia di prensa di POR, minister Andin Bikker no solamente a pidi den nomber di su partido pa minister Marisol Lopez-Tromp entrega su cartera dialuna mainta.

Ademas cu el a despedi Lopez-Tromp como miembro di partido POR, simultaneamente a despedi di Otmar Oduber como lider di partido. Esaki despues cu e ex-minister a tuma e decision di no sigui mas cu su carera politico. Actualmente Bikker ta asumi e liderazgo di partido POR.

Dialuna ultimo durante un conferencia di prensa convoca pa ex-minister Otmar Oduber y contestando pregunta di Bon Dia Aruba, el a referi cu e acusacion cu fundacion Nos Ta Aruba a entrega na Ministerio Publico contra dje, no ta debi cu ainda e tabata lider di POR. Pasobra e no tin niun protagonismo politico mas.

“Mi tin seis luna cu mi ta inactivo completamente di politica.” Oduber a agrega cu a cuminsa un propio oficina di consultant y tambe e ta dedicando na su bida priva.

Sinembargo Oduber a bisa cu e ta sigui sostene su partido y tambe gobierno actual, caminda POR ta parti di e coalicion. Tambe e ta haya cu como cualkier persona, e mester wordo respeta riba e partido y gobierno cu e kier sostene.

Te ainda dialuna ultimo e transicion den liderazgo di POR a yega di tuma luga. P’esey Oduber a bisa cu e liderasgo aki semper a wordo comparti cu minister Andin Bikker. Pero desde cu el a retira como minister, tambe Otmar Oduber a expresa su deseo di retira for di partido.

Oduber a laga sa cu tabatin un congreso cu mester a luga na mei, pero pa motibo di e covid, esey no a sosode. Pero el a declara cu ya caba pa e mayoria di e decision paden di e partido, esaki ta wordo tuma pa Andin Bikker.

Esaki no ta kita – segun Otmar Oduber– cu e por sigui contribui y participa como miembro di POR. Tambe e por duna su conseho tur caminda cu e por haci’e. E no ta wak motibo pa cambia, ni si mañan oficialmente e no ta lider di partido POR mas. Locual a sosode diahuebs ultimo den un reunion di conseho di partido POR.

Igualmente Otmar Oduber ta kere cu si un hende kier su pais, ‘bo por duna bo opinion y contribui.’ Den e crisis di Covid mes cu nos pais ta confronta, na dado momento ex minister Otmar Oduber a wordo pidi pa duna cierto consehonan. El a bisa cu a haci’e gratuitamente.