Tin ora ta bon pa refresca memoria di nos ex mandatario cu actualmente no ta ni forma parti di Parlamento di Aruba unda cu sigur su votadonan ta sinti laga na caya paso a vota pa su representacion den parlamento. Pero esey ta keda na cada persona cu nan consenshi y specialmente di e mandatario aki en cuestion. 

Nos por recorda campaña 2009 unda cu sigur e lema tawata cu BBO lo wordo elimina. Na momento cu e gobierno e tempo ey a tuma over, a rebaha e BBO di 3% pa 1.5% y pa despues di algun tempo introduci un BAZV na 2%, significando cu mester e paga e BBO & BAZV hunto na 3.5%.

Alabes a hisa loke ta e premie di AZV y AOV na loke nos conoce te dia di awe, esta AZV 10.5% cual ta 8.9% werkgever y 1.6% werknemer y loke ta trata AOV-AWW esaki a bira 15.5% cual 10.5% werkgever y 5% werknemer.

Asina a conoce diferente subida riba diferente leges y servicionan di gobierno.

Un cos cu semper tawata remarcabel ta, cu na momento cu mester a atende cu presupuesto di Land Aruba semper e gobierno tawata inclui entradanan cu e tawata spera di haya di e.o. Valero e tempo ey y otro postnan cu tambe tawata conta cu nan. Hincando esaki den bo presupuesto, riba papel semper lo mustra cu bo tin un entrada hopi halto, pero de facto na final di dia bo tin un deficit enorme riba bo presupuesto. Esaki nos por a wak claramente den e coresponcia entre Aruba y Hulanda na 2014 cu a termina den un welga di Hamber cu nos conoce como Welga Ensure. Consecuentemente Aruba a haya su mes ta acepta un CFT unda cu nos a wordo poni bou di Financiele Toezicht.

Na momento cu un persona kier renoba p.e. su hypotheek e ta bay banco pa asina refinancia su hypotheek. Banco lo por reduci e porcentahe di interes, pero e suma fia si ta subi. Esaki ta signifa cu na final di dia bo gasto a subi. Esey ta loke a pasa cu Aruba cu e diferente PPP projecten.

Como ciudadano bo ta pensa cu bo lo por haya entrada adicional di otro fuentenan di entrada los di bo trabou, den forma p.e. side job pa cumpli cu banco. E side job no ta algo sigur y bo no por conta cune tur luna. Na momento cu bo no por cumpli cu bo pago di hypotheek, of bo ta bay bou curatela of banco ta tuma posicion di bo propiedad y bende esaki riba findishi.

Wel esey tawata e refineria durante e gabinete anterior. A haci varios proyectonan grandi contando cu lo por cubri e gasto cu algo cu no tawata duna siguransa, y den e caso aki e refineria hasta tawata cera. Awo nos ta varios aña despues y gobierno a cambia.

Kico nos ta wak awendia, un gobierno cu na su turno ta haci su maximo esfuerso pa atende cu e retonan aki na un manera sostenibel y realistico. A bin cu reforma fiscal unda cu na comienso di aña ya caba hopi doño di cas cu un balor abou no lo ta pagando grondbelasting. Y otronan cu e suma di grondbelasting a conoce un rebaho den e reforma fiscal. A elimina e diferencia entre tarief I y II den bo loonbelasting haciendo esaki 1 solo. Cual a signifa pa mas cu 50% di e poblacion laboral di Aruba un rebaho den nan loonbelasting tur luna.

Asina mes cu tur e retonan financiero cu Aruba ta confrontando su mes, Gobierno di Aruba a sa di respeta e protocolnan firma den pasado, cumpliendo debidamente cu su habitantenan.

P’esey mi no por compronde con e autor principal di tur esaki kier critica o haci cu e no tin nada di haber cu loke ta pasando. Como un persona integro cu respet propio y dignidad ta keda nada otro na duna honor na bo mes y retira di politica. Laga otro tuma rienda y sigui lucha pa hiba nos dushi Aruba dilanti.