Ainda no tin nada concreto riba e negociacion cu ta tumando luga entre otro cu gerencia di Hospital y sindicato ABv cu ta representa mayoria di trahado di enfermeria y di sector di cuido pa loke ta trata un contracto colectivo (CAO).

Bon Dia Aruba a consulta cu minister di Salubridad Publico, Alex Schwengle kende a bisa cu ainda e no tin un update recien di e desaroyo di e negociacion aki. Mientras di otro banda presidente di ABv, Gina Maduro a laga sa na e matutino aki cu ainda “no tin nada concreto”, pues e situacion ta status quo.

E locual cu e mandatario ta considera importante ta no solamente e aspecto di salario, pero principalmente esun cu tin di haber rond di e pensioen di e trahadonan di cuido. “Nos sa cu e pensioen di hospital no ta hopi bon. E ta hopi tiki!”, el a bisa.

Tin un analisis cu ta andando pa wak con nan ta bay drecha e CAO, ya cu cambio aki mester sosode y e minister ta “para su tras”. Aunke ta reconoce cu esaki lo costa cen, pero e proceso aki ta uno cu mester a tuma luga caba. Pa por drecha e situacion, mester haci a base di calculonan financiero.

Tambe –segun e mandatario- e discusion mester ta kende ta carga kico ya cu ora di carga algo asina ta importante con nan ta bay reparti e gastonan. Pa motibo cu ta asunto di pensioen, e ta un responsabilidad di e trahado tambe y no solamente di e dunado di trabou. E minister no a bay mucho den detaye ya cu e no tin un update recien. A pesar cu e ta hopi ocupa, e mandatario a laga sa cu e ta activamente buscando e update aki.

Seguro di imparcialidad laboral
Otro punto cu e mandatario ta considera importante ta e evaluacion cu nan ta haciendo pa wak si ta posibel di bin cu un seguro pa e trahadonan aki di enfermeria y cuido di pashent. El a bisa cu generalmente e tipo di seguro aki ta caro. E ta papiando specificamente di un seguro cu nan ta yama un seguro pa incapacidad laboral. Esaki ta pa cubri e trahado si e mester keda incapacita door di bo trabou mes di tal manera cu bo no traha mas. Aunke trahadonan tin e seguro di SVb cu ta cubri e gastonan pa dos aña, despues di esey e persona no tin nada mas.

Pa medio di e seguro di accidente aki nan kier brinda mas proteccion na e trahadonan di e sector di cuido; si den caso e persona ta keda impedi pa traha, e por conta cu un seguro extra. Den caso cu e trahado ta keda incapacita na un edad relativamente jong, e mester por tin un garantia di por ehempel gosa di un 50% di su ultimo salario, te ora cu e ta yega na edad di pensioen. Un aspecto interesante cu mester sali di tur e discusion aki ta si e cambio den e pensioen y e introduccion di un seguro di accidente pa e trahadonan specifico aki ta posibel. E minister a trece manera ehempel a base di su mesun experiencia y datonan cu e tabatin antes, cu si bo kier traha como dokter riba bo mes, naturalmente bo kier evalua si bo mester di extra seguro pero e sa cu e seguro priva pa e dokternan cu ta traha ariba nan mes ta hopi caro. E mandatario ta pensa cu si nan por haci’e colectivamente pa un grupo grandi di e sector di salud, e prijs lo ta mas accesibel. Pa e motibo aki e ta haya importante pa wak con e asunto lo desaroya.

E minister nota kere cu e proceso di analisis aki lo por tarda hopi pa bin mas claridad. Sinembargo e ta reconoce cu hospital ta hopi ocupa, ya cu e proceso di expansion y renobacion di nan infrastructura ta tumando luga actualmente. Tambe nan ta brindando capacitacion y actualisacion pa medio di cursonan specialisa cu ta tumando luga continuamente pa nan personal. Esaki no ta kita afo cu e CAO pa e trahadonan mester haya su atencion, segun Sr. Schwengle.

Sr. Schwengle ta gradici ABv cu a bin ta carga hopi pasenshi den e proceso aki, pero e ta consciente como mandatario cu pa e otro aña mester tin un CAO nobo. Aworaki nan a firma un extension di e CAO manera e ta pa eynan bin cu un acuerdo nobo teniendo na cuenta e asunto di pensioen y seguro pa e trahadonan. “E aña cu ta bin ta bay bira un aña hopi importante”, el a bisa.

Pa loke ta e parti financiero pa atende cu e cambio aki den e CAO nobo, Sr. Schwengle ta haya cu financieramente gobierno mester duna nan e espacio. E mandatario tin tur confiansa no solamente den sindicato ABv pero tambe di hospital, cu nan lo haci nan maximo esfuerso pa yega na un bon acuerdo y den tur trankilidad.

E di tres aspecto cu e mandatario ta haya relevante ta pa bin cu mas enfermero ya cu actualmente ta existi demanda of falta di trahado den e sector aki. E problema aki no ta existi na Aruba so, pero esaki ta un problema grandi tanto na Europa como na Merca tambe.

Un dilema cu nan ta evaluando ta con nan por haci mas atractivo ainda, na banda di e salario, pa e trahadonan di enfermeria por keda traha mas largo posibel, pero tambe cu placer pa nan trabou. E minister ta haya cu mester haci e trabou aki mas interesante, di tal forma cu nos hubentud ta haya atractivo pa bay den e ramo aki.