Desde añanan 60 di siglo pasa e isla St Croix, parti di Islanan Virgen Mericano, tin un refineria cu a opera te na aña 2012, e mesun aña cu refineria di Aruba a cera. E compania, originalmente di Hess Oil y Pdvsa (Venezuela) a ser bendi na 2016 for di bancarota cu un consorcio Mericano cu na 2018 a cuminza cu rehabilitacion di e refineria, cu e proposito di cuminza opera atrobe, bao di e nomber di Limetree Bay, cu 200.000 bari pa dia (bpd) di e original 550.000 bpd. Si Limetree Bay logra su reinicio, e lo ta e adicion di refinacion mas grandi riba teritorio Mericano, desde cu BP a añadi su refineria na Whiting (250.000 bpd) ocho aña antes.

Limetree Bay Refining lo ta capaz di procesa crudo pisa y acido di America Latino, cu e proposito di benta den marcado den Caribe, America Central y Suramerica, y East Coast Mericano, segun e propio empresa. Limetree Bay Ventures ta un joint venture entre afliadonan di ArcLight y Freepoint Commodities, controla pa firma di inversion EIG Global Energy Partners.

E perspectivanan no tabata mustra malo. E consorcio a logra cera na 2018 un asina yama ‘tolling agreement’ cu British Petroleum (BP), den cual BP lo ta suministra e crudo necesario, 200.000 bpd, y tambe lo tuma e productonan di e refineria. Punto clave den e acuerdo tabata cu Limetree lo entrega fuel oil maritimo cu contenido abao di azufre, cu ta cumpli cu e norma nobo pa esaki (IMO2020) di Internacional Maritime Organization (IMO). BP ta considera e combustible nobo aki, cu ta cumpli cu ultimo normanan pa promove normanan ambiental, un mihor producto pa mercadea cu enfoca riba gasolin y diesel, cu den hopi caso ta e productonan di mas interes, aunke den un fase mas laat lo por haci esaki tambe. Na fin di 2019 ainda e refineria no tabata cla pa cuminza opera, ya cu e reparacionnan a resulta mas dificil y mas costoso cu anteriormente a pensa. Finalmente e consorcio lo a gasta mas di un biyon dollar, di originalmente US$ 1,6 biyon pa mas di US$ 2,7 biyon te awor. Limetree a cambia di CEO na november 2020 pa purba cambia e situacion.

Segun informacion entre otro di Reuters, nivel halto di corosion den tuberia y e problema tambe di e pandemia cu a corta grandemente den e demanda global pa fuel pa barco durante 2020, a cambia e perspectivanan. Durante henter 2020 e consorcio no a keda cla y BP a menaza di renuncia e contract a base di fayo di Limetree pa cumpli cu e fecha di inicio di entrega di producto. Finalmente BP a pone un ultimatum pa januari 2021 y na februari 2021 e refineria a start su operacion. Esaki sin embargo no a bay sin problema, despues cu na december ultimo ya tabatin un candela cu a paraliza trabao. E aña aki atrobe a surgi problemanan tecnico cu a obliga para e proceso na varios momento. E ultimo problema ta data di algun siman atras, unda un explosion grandi, di origen desconoci ainda, ya cu e empresa a keda den silencio tocante e incidente, a cubri parti di e isla bao di un capa di azeta y vapor, cubriendo cas, caya, vehiculo y vegetacion pareu.

Mientras tanto BP tabata birando impaciente, y personal di Limetree a conta cu BP ta exigi cu e refineria mester por core dos siman sin problema, o sino nan ta termina e deal. Desde cu a cera e deal mas di dos aña pasa, margen di refinacion pa fuel maritimo a cay hopi den e actual pandemia. Tambe medionan specializa manera Reuters y Bloomberg ta señala cambio den strategia di e companianan mas grandi den petroleo, cu a cuminza cambia nan focus mas den direccion di produccion di energia renovable, entre otro di hydrogen.

E ultimo fracasonan pa start e refineria na un manera constante a haci cu parti di e topmanagement a dicidi di “jum ship” manera e medio local Virgin Islands Free Press a describi e cambio dia 8 di april ultimo. E Chief Financial Officer y dos otro top manager a anuncia nan salida despues di e ultimo accidente. Fuentenan cerca di BP ta bisa cu e compania no a dicidi ainda di termina e cooperacion, pero ta cerca di e momento ey si. No tin claridad ainda cuanto e planta tabata procesa promer cu e ultimo incidente. Cifranan internacional di transporte ta indica cu a exporta un total di 1.373.975 bari di fuel, principalmente diesel cu contenido halto di azufre, naphta y jet fuel, un promedio diario di alrededor di 44.300 bpd, bastante aleha di un proceso di 200.000 bpd.

E compania ta bisa awor cu e sitio ta un ‘world-class energy hub’ y tambe un centro logistico cu bon ubicacion den e region, cu un terminal di crudo y producto di en total 34 miyon bari.

Conclusion

E historia reciente di un di e otro refinerianan di exportacion den Caribe ta ilustra hopi bon cuanto problema por surgi di e hecho cu un refineria den e region aki a para den solo, biento y awacero desde 2012. E refineria di Aruba, si acaso logra su rehabilitacion, lo tin mas di 10 aña cera na e momento di reapertura. No ta trata solamente di e costo, sino tambe di e perspectivanan di mercadeo den nos region. No ta pornada a scoge pa un producto specifico cu no ta gasolin y diesel, e dos productonan mas pidi, pero pa cual tur pais mayor den nos region, tanto isla (grandi) como paisnan riba costa firme, tin nan propio refineria pa produci principalmente e productonan aki. E demas refinerianan di exportacion, Aruba, Corsou y Trinidad & Tobago mester tene debido cuenta cu e limitacionnan aki di benta di producto den nos region. Informacion importante tambe pa nos ciudadania huzga e viabilidad di habri e refineria na Aruba.