Den e rapport di CAft tocante overtime publica recientemente, despues di Cuerpo Policial, KIA ta e siguiente entidad cu mas overtime total y cu promedio halto pa persona. E cantidad di ora di overtime a bay di alrededor di 84.000 na 2015 pa casi 95.000 na 2017, pa 88.000 na 2018.
E cantidad di empleado a keda mas o menos igual, rond di 170, pero e cantidad di esnan cu ta traha overtime a baha drasticamente, di 142 (2015) pa 122 (2018). E cantidad di ora promedio pa cada empleado a subi di 591 na 2015 te 723 ora na 2018, indicando un situacion sumamente grave. E 43 empleadonan cu mas a traha overtime (25% di e total), a yega na un promedio di 28 ora pa siman di trabao extra. E top 5 di empleado cu mas overtime tabata traha como promedio 43 ora pa siman na overtime.
AO.
E porcentahe di ausencia pa AO na KIA na 2018 tabata 12,9%. E cantidad di dia ausente total tabata 9.057 y e cantidad di ‘melding’ tabata 2.597. E promedio di cantidad di dia ausente pa AO pa cada empleado tabata 52 dia pa aña. E duracion promedio di AO tabata solamente 3,5 dia, indicandi hopi ausencia di duracion cortico. Esaki ta keda ilustra tambe pa e frecuencia halto di notifica AO na KIA, cu ta 13,6 pa persona, esun mas halto di henter aparato gubernamental, unda e promedio general ta 5,4.
Ta obvio cu e situacion na KIA ta insostenible, segun e informe. Mescos na polis tin empleado cu ta traha double shift continuamente loke ta un menasa pa nan salud y pa seguridad di e institucion. E sobrecarga cu ta surgi riba su mes por ta causante di AO. Un factor hopi menciona ta e falta di personal. Segun e rapport di CAft e plan general di personal ta contempla 317 Full Time Equivalents (FTE), mientras e ocupacion actual ta 173.
A pesar cu falta di personal ta hunga un papel obvio, den e comunicacion cu e institucion a tende cu tambe tin caso di abuso di personal cu ta meld AO pa otronan por traha overtime. A tuma medida pa empleadonan mes no por planifica overtime mas. Den caso di implementa sancion contra un empleado, e experiencia ta cu ta dura demasiado largo pa DRH atende e casonan.
Douane.
Despues di Polis y KIA, Douane ta e servicio cu mas personal. Sin embargo, e cantidad di ora di overtime ta esun mas abao di e cuatro entidadnan analisa. Na 2018 e cuerpo aki a yega na algo menos di 30.000 ora. E cantidad di empleado a subi levemente entre 2015 y 2018, di 187 pa 198, cu 134 empleado cu por traha overtime paga. Aki tambe tabatin un grupo chikito cu ta tuma gran parti di e overtime pa nan cuenta: 50 empleado (25% di e total) a traha 21.743 ora, cu ta 73% di tur overtime traha. Na 2018 tabatin dos empleado cu a traha mas di 800 ora di overtime, cu ta 18 ora cada siman henter aña.
AO.
AO den Aduana ta poco mas halto cu e promedio di gobernacion en general: 8,8%. Cantidad di dia ausente pa AO tabata 6.562 y e cantidad di AO-melding tabata 1.688. Cantidad di dia ausente pa cada empleado ta 33. Promedio di duracion di ausencia ta 4,4 dia. Esey ta bastante abao y ta mustra riba hopi AO di corto duracion, algo logico cu un frecuencia halto di melding di 8,2, mientras gobernacion en general ta na 5,4. Aki tambe tabata imposible pa determina si ausencia halto ta causa pa sobrecarga di trabao, o ta ausencia halto ta causa falta di personal, y por lo tanto overtime.
Den entrevista cu Caft direccion di e entidad ta duna di conoce cu ta un grupo relativamente chikito structuralmente ta meld AO. Ta mira AO como e causante principal di overtime. A purba maximalisa overtime na 40 ora, pa luna, pero esaki no a funciona pasobra ta e mesun hendenan a keda traha overtime y a surpasa e limite. (Loke ta mustra straño pasobra ta leiding mester designa overtime y no mester depende di e mesun voluntarionan; red.).
Brandweer.
E cuerpo mas chikito den e analisis ta Brandweer. E cifranan di overtime ta mustra un tendencia creciente di 36.029 na 2015, te 52.013 na 2018. E cantidad di personal a baha entre 2015 y 2018, di 140 pa 135. Na 2015 tabatin 125 empleado cu tabata traha como promedio 288 ora pa aña; na 2018 esey a bira 122 cu ta traha 426 ora pa persona como averahe. Pa siman esey ta un promedio di 9,5 ora pa siman di overtime pa tur empleado.
E 34 empleadonan (25% di e total) cu na 2018 a haci mas overtime, tabata responsable pa 27.673 ora, 53% di e total na ora di overtime, pa un promedio pa siman di 18 ora di overtime. Dos empleado a yega na mas di 1.300 ora di overtime y a traha un promedio di 30 ora pa siman na overtime di forma structural.
AO.
Ausencia pa motibo di enfermedad na 2018 tabata na 8,3%, den linea cu e promedio general. Cantidad di dia di AO tabata 4.939 y e cantidad di notificacion tabata 884. E promedio di dia ausente pa cada empleado tabata 37. E promedio di duracion di AO tabata 6,3 dia, loke ta den linea cu e tendencia general den henter e aparato publico y ta indica un combinacion di duracion largo y cortico. Tambe e frecuencia di ‘meld AO’ ta igual na esun general den gobernacion: 5,4.
E comandante di Brandweer ta indica cu overtime tin principalmente como causa e falta di personal. Tin demasiado poco solicitante y aña pasa a perde un cantidad di empleado pa via di pension. E ultimo tanda di empleado ta di 2012, despues no tabatin mas personal nobo. Ta constata cu cada biaha ta e mesun personanan ta mustra disposicion pa traha overtime. E cantidad di personal ta asina poco cu hasta vakantie regular ta conduci na overtime. Den practica , segun e director, ta un fenomeno normal cu ta mira un empleado traha dos siman di double shift, pa despues bay AO un siman. Riba e sugerencia pa cuminsa traha cu voluntario, e comentario tabata cu cierto empleadonan ta mira esey como ‘kita nan pan’. Tambe e direccion ta bisa cu den e cultura di Aruba casi no conoce trabao voluntario.
Ta observa di banda di CAft cu no ta bon pa laga semper e mesun hendenan traha overtime. Banda di e problema di salud tin e aspecto tambe cu nan ta cuminsa mira esaki como un derecho adquiri, manera observa cerca otro entidadnan tambe. Sin embargo, CAft ta mira posibilidad pa pone un maximo na ora di overtime, por ehemplo, 60 ora pa luna.
