Segun un reciente estudio di investigadonan na Spaña, na e momentonan aki abehanan di gran parti di mundo ta enfrentando diferente efecto di cambio climatico y expertonan ta batiendo alarma riba e situacion aki.

Conocedonan di e tema ta señala cu un insecto chikito aki, vital pa polinisacion di planta y cultivonan, ta enfrentando desafionan fuerte debi na e crisis climatico reciente cu ta afecta diferente parti rond mundo.

Investigadonan di Centro di Investigacion Ecologico y Aplicacionnan Forestal (CREAF) di Universidad Autonomo di Barcelona a haya cu aumento di temperaturanan ta mustra cu e insecto aki ta mas vulnerabel compara cu efectonan di pesticida.

Tambe algun estudionan specifico riba otro especienan ta indica cu e poblacion di abehanan por reduci te hasta un 70% si condicionnan actual ta persisti.

Pero e pais aki, ta dobel vulnerabel manera e rapport: “Impacto, vulnerabilidad y adaptacion na cambio climatico di apicultura” di un banda, ta señala cu Spaña ta un di e paisnan mas sensibel na mundo debi na su ubicacion, ta relaciona cu impacto climatico y di otro banda, pa motibo cu ta e pais number 1 na mundo cu cantidad di colmena (2.4 miyon).

Por a recorda cu na 2018, Bon Dia Aruba a tene un entrevista cu Luis Winterdaal di Lui Bee Farm Aruba, nan a splica cu e importancia di abehanan ta pa mantene e mundo berde, mantene e flornan, un reina di abeha ta biba pa 5 aña y un abeha normal ta biba dos luna, e abeha normal tin un funcion pa luna cu ta busca e polio y chupa su nectar. Nan ta peligroso pa motibo cu nan ta defende nan reina.

Abehanan a yega Aruba pa via di e tres barco ‘La Pinta, La Niña y Santa Maria’ nan a bin cu hopi bestianan, entre nan tabata abeha cu a bin den box tapa y e tripulacion a laga nan pa bay y nan a sigui cu e reproduccion na Aruba y e resto di Antia.

Pa Winterdaal e cambio climatico ta un factor importante pa e abehanan pa motibo cu ora awa no ta yobe, e flornan no ta Sali, na e temporada seco e abehanan no lo por chupa flor.

Winterdaal a bisa cu su pasion pa e abehanan a cuminsa 54 aña pasa ora e tabata Sali pa varios caminda cu su omonan e tabata saca e panelanan di honing riba un palo y manda pa su omo, despues nan mester cana riba su brasa cu tur e panelanan di honing of pone riba e burico y nan tabata cana cu e.

Su mama tabata sigui cu e proceso di exprimi e panelanan y asina nan a cuminsa haya e honing.

Despues el a duna di conoce cu pa via di hende malo cu a daña tur su materialnan el a para cu e trabou, hopi añanan despues un amigo dje a bisa si el lo por yuda pa coy e abehanan pa motibo cu su amigo tabata tira yuwana y asina el a cuminsa traha su trahe pa bay cu e mucha homber pa haya honing.

E conseho cu el a duna den entrevista ta ora un persona a haya un abeha no lo bay bringa cune, pa motibo cu nan ta defende nan teritorio y nan reina, si ta existi algun caminda cu e persona tin un panel di abeha mester yama un persona cu conocemento y asina lo por preveni un accidente of e abeha mes lo por pica un persona alergico y e caso lo por bira pio.