Analisando tur opcion pa aumenta presion riba Venezuela

Diahuebs ministro di asunto exterior di Spaña Alfonso Dastis, despues di un reunion cu ministro di asunto exterior di Merca Rex Tillerson, a bisa cu “mester sigui cu presion riba Venezuela pa asina logra cu e pais aki bolbe pa un sistema democratico.” Dastis a bisa cu ta traha riba un encuentro entre presidente Mariano Rajoy y Donald Trump pa temporada di otoño.

“Mester continua cu mas presion pa logra cu Venezuela por bolbe pa un sistema democratico, y cu gobierno por laga tur preso politico den libertad, cu eleccion liber universal y secreto,” Dastis a opina. E declaracion di Dastis a tuma lugar na sede di departamento di estado di Merca, despues di un reunion cu Tillerson, cu segun Dastis tin mesun posicion cun’e.

Dastis a bisa cu mester traha cu pais di e regio di Latino America. El a lamenta cu e iniciativa di Mexico den organisacion di estado Mericano (OEA)  no tabatin ningun exito.

OEA, den su asamblea di  2017 cu a tuma lugar na Cancun, Mexico siman pasa, no a logra e aprobacion di  e iniciativa cu a sali for di  Mexico, cu tabatin e  apoyo di  Merca. E iniciativa tabata purba di inclui e situacion di crisis di Venezuela den e documento di resolucion general riba derecho humano. E ausencia di situacion di Venezuela riba e documento di resolucion di OEA a ser interpreta como un victoria diplomatico di pa gobierno di presidente Nicolas Maduro. Un alternativa tabata e posibilidad cu e ministro di Spaña a presenta, tocante posibilidad di crea un grupo di amigo,  cu por permiti na tur dos partido den e conflicto, gobierno y oposicion, pa sinta y dialoga tocante e situacion actual di Venezuela, y asina purba di finalisa e crisis economico, politico y humano cu nan ta bibando aden awor.

Dastis a bisa cu nan ta continua cu mas intento y mas presion, pa asina logra e celebracion di eleccion liber na Venezuela. El a splica cu ta importante cu oposicion por consolida e union aki, pasobra ta un rekisito basico pa logra algun alternativa.

E crisis politico y economico di Venezuela a origina hopi protesta, cu tin mas di tres luna caba, y cu a laga mas di 80 morto pa represion di autoridadnan militar y policial.