archivo nacional edificio (1).JPG

Actualmente algun trabou ta tumando luga den Archivo Nacional Aruba (ANA), cu nan servicio pa publico lo ta limita parcialmente pa un periodo cortico.

 

Director di ANA, Sr. Raymond Hernandez a declara na Bon Dia Aruba cu nan tin algun tempo cu nan ta trahando cu e situacion di nan sistema di airco. Nan a haya airconan nobo pero tambe nan ta trahando riba infrastructura di e tubonan di e airco cu mester wordo cambia.

 

Pa tal motibo durante e proceso di trabou cu ta bin tumando luga caba, nan a yega na e momento cu tin di haber cu nan sala di estudio. Esaki ta e sala cu nan tin disponibel no solamente pa exposicion sino pa e publico den general cu ta bin consulta nan archivonan. 

 

E trabou den a sala di estudio di ANA ta tuma luga durante dos siman. E trabou ta cuminsa dia 8 di augustus y lo termina dia 19 di augustus. Nan ta premira cu pa dia 22 di augustus e sala aki lo ta disponibel pa nan bishitantenan atrobe.

 

El a splica cu durante un periodo di dos siman, nan servicio normal pa publico, specificamente esunnan cu ta bin sinta den e sala di estudio, ta cera. Tambe pa esunnan cu ta bishita nan pa haci preguntanan tocante algun tipo di informacion, nan servicio ta keda limita temporalmente.

 

“Nos no ta dunando nan e servicio manera cu nan ta custumbra, pasobra e sala di estudio lo wordo cera na unda e personanan no por ta den e parti ey”, el a declara na Bon Dia Aruba.

 

Sinembargo e ta informa na esunnan cu tin cualkier situacion di emergencia cu kier cualkier tipo di informacion por yama libremente na ANA (583-4880). Esaki ta un canal cu ta keda habri pa esunnan interesa di busca cualkier informacion cu nan ta interesa na dje.

 

Tambe nan por acudi personalmente na ANA tambe nan ta bonbini, pero nan tin cu pasa na banda di edificio unda tin e porta pa e trahadonan.

 

Sr. Hernandez a aclaria cu nan ta habri pero no pa e usuarionan bin sinta haci investigacion na ANA, pero simplemente pa busca informacion. El a reitera cu dia 22 di augustus nan ta spera cu ANA ta habri completamente cu servicio normal pa publico.

 

Edificio

 

Tambe el a bisa cu un soño cu ANA tin cu nan lo desea cu pronto lo por bira realidad ta esun di un edificio ideal cu por cumpli cabalmente cu e normanan y standard exigi internacionalmente pa loke ta trata e conservacion di material cu balor historico, ya sea den su forma original di hard copy of digitalmente.

 

Actualmente nan ta den un edificio na huur cu durante e añanan cu ANA ta trahando eynan, nan a purba di condiciona pa e tipo di trabou cu nan ta realisa. Sr. Hernandez a declara na e matutino aki cu particularmente den un edificio dedica na conservacion di archivo loke mester tene cuenta cu ne ta e depositonan, y no e luga unda nan ta traha, ya cu e porta cualkier oficina.

 

Den e caso aki nan sede actual ta cumpli completamente cu e parti di localidad administrativo y di servicio pa publico. Pero e parti mas esencial y cu ta e motibo principal cu ANA ta existi ta esun di deposito pa salvaguardia tur material di balor historico como un archivo nacional.

 

Actualmente –segun Sr. Hernadez- e parti di deposito ta “basta bon pero por miho…”.  Pero e necesidad di un deposito ideal ta latente caminda nan por warda nan materialnan di un forma hopi sigur pa cualkier eventualidad ya sea horcan, mal tempo y/of candela cu bo sa cu e material den ANA cu ta nos memoria nacional ta bon conserva.

 

“E no ta solamente pa e documentacion cu ta ariba papel pero tambe e parti di digilitacion”, el a bisa. El a agrega cu den mundo di archivo di awendia ta wordo papia di E-depot cu ta e deposito unda bo ta warda tur material digitalisa pa medio electronico. E ta compara esaki como un caha di siguridad cu  banco tin pa warda material di balor. “Esey ta un soño cu nos ta trahando ariba dje y pronto nos ta spera di por haci un proposicion na gobierno”, segun director di ANA.

 

Proposicion

 

ANA lo desea di haya un luga cu ta wordo construi segun e rekisitonan minimal cu ta wordo rekeri pa un archivo. E no kier bisa cu nan intencion ta di busca e edificio mas moderno of sofistica manera cu Merca y Hulanda por, pero a lo menos cu e edificio aki por cumpli cu e rekisitonan basico di un bon archivo.

 

ANA ta spera cu ainda prome cu fin di aña nan por ta asina leu pa pone un proposicion concreto pa Gobierno. Tin plannan pa ANA busca otro caminda pero Sr. Hernadez su punto di bista ta cu un archivo bo no ta mud’e cada 5 of 10 aña, sino cu por lo menos esaki mester sosode por lo menos pa un 50 aña of mas. E ta argumenta cu nan tin hopi material delicado cu por sufri daño of nan por deteriora cada bes bo ta muda nan.

 

Nan ta den proceso pa atende debidamente cu e asunto aki, pero ainda nan no a sali completamente afo kico ta bay sosode. ANA ta trahando riba un probabilidad di un proposicion di un edificio cu nan lo presenta na Gobierno. E edificio aki por wordo uza no solamente pa ANA, pero eventualmente pa e por sirbi pa ehempel na Biblioteca Nacional Aruba (BNA).

 

El a laga sa cu entre ambos instancia di gobierno ta existi un estrecho colaboracion, caminda un  BNA por warda material den ANA. Di e forma aki nan ta purba di crea un deposito cu ta sirbi pa interes di ambos departamento.