Aña escolar a cuminza… Cu problemanan ‘status quo’…

Aña escolar a cuminza atrobe, y manera semper ta requeri cierto animo y bon voluntad pa inicia e tareanan. Esey sigur lo ta presente, pero falta e perspectiva di cual direccion nos enseñanza ta tuma, mas a largo plazo. Atencion hopi biaha ta enfoca riba problema di e condicionnan den cual enseñanza mester funciona, mientras e asuntonan strategico no ta haya suficiente atencion, y sin follow up adecuado. Asina problema di organisacion den (parti di) enseñanza ta keda kita atencion for di problema mas crucial, manera e asunto di pago di e werksternan na SKOA, cu a para bira un postema politico considerable, cu e agravante cu no ta mira solucion.

Parti di e problema ta cu den pasado a haci promesa falso na e personal aki, cu tabatin e aspiracion eroneo di bira ambtenaar. Bao di circunstancia normal un gobierno ‘normal’ lo mester bisa nan cu esey no ta bay sucede, pa dos motibo. Uno ta cu pa principio no tin pakico di expande nos cuerpo di empleado publico cu personal cu ta traha pa un fundacion di corte priva, y cu e personal mester ta paga cu e subsidio cu ta haya di gobierno, a base di igualdad en comparacion cu otro recipiente di subsidio, bao circunstancia igual. Como empleador priva e fundacion tin e derecho pa desvia positivamente di e criterionan di pago di gobierno, basta nan mes carga e gasto extra cu esaki ta implica. No por pensa, ni mucho menos vocifera cu ta gobierno mester carga esaki. E problema aki ta sin embargo, y lo keda tambe, un problema politico unda politico no tin e curashi pa bisa e empleadonan y e fundacion cu juez a papia bon cla na dos ocasion caba y cu ta defini bon cla pa nan con ta bay sigui.

Di igual manera nos mester pone un banda e problemanan cu tin riba tereno di mantenimento di edificio, asunto di airco si of no, y ken ta paga kico, sino nunca nos ta yega na dedica atencion debido na e problemanan grave di nos enseñanza. Esey ta mustra facil pa bisa, pero en realidad e no ta funciona asina, pa un motibo, segun nos.

E punto ta cu ora surgi un problema tecnico o logistico, e ta para bira un problema mayor pa varios aña. Mientras tanto tin un cantidad di problema fundamental cu ta daña posibilidadnan futuro di nos yiunan como adulto y profesional, cu no ta haya atencion. Y e motibo pa no haya atencion ta cu e efecto negativo no ta visible inmediatamente; nos ta duna un ehemplo. Ora un mucha ta lanta den un cas unda nunca nan ta mira un adulto cu un buki o corant den nan man, esaki por ta pasando varios aña sin cu un persona ta señala esaki. Si na scol tampoco ta duna atencion na mucha cu ta keda atras den lesamento, y no ta informa y discuti cu mayornan cu nan mester pone di nan parti pa nan yiu por tin un desaroyo satisfactorio na scol. E efecto negativo no ta tanto visible na e momento ey, sino cu e ta acumula como un di e obstaculonan grandi pa por avanza despues den educacion superior. E ta bira visible ora e mucha ta hende adulto caba y ta ripara cu e nunca por a realiza e ambicion cu e tabatin den su carera profesional, pa e limitacionnan cu a impedi su desaroyo tanto aña pasa…

Ta pesey cu por ta parce un frase, un lema y no mas cu esey, pa bisa cu enseñanza mester ta basa riba duna tur mucha e posibilidadnan mas amplio posible pa desaroya nan mes desde edad tierno, haciendo uso di nan talento y ambicion. Bunita bisa, pero con ta haci esaki? En todo caso no manera nos a hacie te awor. Si nos wak atras 30 – 40 aña, kico a mehora? Nos a lesa atrobe recientemente e rapport tocante resultadonan di nos studiantenan na Hulanda di aña 1993, titula “Een Koude Douche”; “Een onderzoek naar het studieverloop van oud-leerlingen van het Colegio Arubano in Nederland”. Si nos no a mira e portada di e analisis, nos por a kere tambe cu a skirbi esaki aña pasa… No cu e ta un excepcion grandi; e hecho cu no a haci practicamente nada cu e estudio aki no ta nada nobo, es mas, esey ta unda mayoria di estudio, riba cualkier tereno, ta termina…, den e bari di olvido. Y cada biaha ta trece otro experto bin conta nos e mesun cosnan.

Nos ta na altura cu hustamente riba tereno di enseñanza e colaboracion den cuadro di e reformanan structural cu mester haya bida bao di e capa di COHO, a inicia caba. A traha un analisis preliminar, un tipo di ‘nulmeting’ cu no ta indica tur problema y aspecto te den detaye, pero e ta un inicio. Sin embargo, sigui riba e bon caminda ta depende di un par di cos. Un di nan ta cu mester tuma e decisionnan clave pa loke ta entre otro idioma di instruccion den enseñanza. Otro ta e colaboracion den bon ambiente cu Hulanda cu ta coriendo peligro, pa e acontecimentonan cu por tuma lugar pronto, si gobierno di Aruba haya un instruccion pasobra no tin coreccion di e rumbo financiero di nos pais. Ta bay grita atrobe cu “nos mes por”? Nos no tin e recursonan, punto.