‘Aña di recuperacion’… Ta lanta expectativa falso…?

Poco poco nos ta cuminza mira mas oposicion contra e medidanan di austerisacion cu gobierno a tuma aña pasa, principalmente e reduccion di salario di tur empleado publico y un parti di esnan cu ta traha pa entidadnan liga na gobernacion. Nos ta bisa un parti pasobra tin entidad, manera Banco Central, cu a keda ‘libra’ di e operacion aki. Y no pasobra nan presupuesto ta hopi preta caba.

Ultimo aña registra (2019) nan tabatin un ganashi di mas di Afl. 25 miyon y nan payroll ta mas di Afl. 18 miyon. Nos ta calcula cu nan tin tanto empleado, cu probablemente nan averahe lo ta casi 200.000 florin pa persona, un averahe envidiable anto. Pero probablemente, si nan no rabia cu nos ta bisa esaki, nan lo bisa algo den sentido di ‘esun cu por, por’ y mester duna nan razon, pasobra ta riba e base ey a crea un sector semi-publico cu ta hopi mihor paga cu e empleado publico normal. Asina tambe e partidonan politico, a traves di e politica di ‘independisa’ un cantidad di entidad gubernamental, a crea e base grandi pa mas di nan hendenan haya puesto hopi bon paga. En todo caso, esun cu mester a haci algo no ta medio di comunicacion sino esnan cu ta sinta den Bestuurskantoor. Nos no ta bay atende aki extensamente e tema di esnan cu no ta contribui, manera nos Promer Ministro tabata vocifera, pero si ta mira cu preocupacion cu e situacion por bay for di man, pasobra entre otro no ta duna suficiente claridad na tur, cu e aña aki tambe, igualmente o talvez peor cu aña pasa, ta ‘aña di hala faha mara’.

Pero, nos lo haya inmediatamente e reaccion acerta di un cu no ta drumi, cu gobierno, atrobe nos maximo mandatario, a anuncia cu e aña aki ta e aña di ‘recuperacion’. Y recuperacion pa hopi hende ta implica ‘mehoracion’, anto di unda a sali cu e salarionan di empleado publico ta keda corta cu e mesun 12,5%? No cu nos ta apoya e opinion describi aki, pasobra nos sa tambe cu e aña aki por bira mas duro cu 2020, cu mas empresa cerando, cu tardanza den recuperacion di turismo di e paisnan importante pa nos, Merca na promer lugar, pero proclamando e aña aki di recuperacion no ta e mihor slogan na e momento aki. Contal cu nos por imagina un situacion unda bao di e calor di campaña electoral, gobierno lo haya bastante contratiempo di parti di sindicatonan, tanto den gobernacion como di e entidadnan liga na gobierno.

Na nos parecer ta un manera tin pa atende e situacion aki, y esey ta pa duna un claridad kico por spera. Esey no ta toca solamente e asunto di salario, sino tambe e medidanan cu gobierno lo mester a cuminza tuma caba, den cuadro di nan propio plan pa reduci gasto di personal aplicando cierto cambionan den e sistema di evaluacion y promocion. Esaki ta loke CAft a reclama den su ultimo reaccion riba e raportahe financiero di tercer trimester 2020, unda ta constata cu gobierno a corta salario, pero por lo demas no a haci nada pa implementa e plan cu nan mes a bin propone y cu a bira parti di e protocol di november 2018. Pa recorda, ta trata aki di e cambionan den ley cu mester bay para e aumento automatico di salario a traves di promocion y ‘periodiek’ cu ta keda pusha gasto extra riba gobierno. Ademas cu di e manera aki ta keda gasta placa extra, sin cu tin un sistema drechi di evaluacion di funcionamento di e empleado publico. Di e banda aki gobierno ta keda un dunador di trabao pesimo, cu no ta cumpli cu e normanan cu lo mester tabata normal caba pa henter sector publico.

Como agravante ta bin acerca awor cu ta dificil pa imagina cu Hulanda ta keda acepta cu gobierno di Aruba no ta haci nada al respecto, ya cu ta papia aki di compromiso cu tabata existi caba promer cu Covid-19 a bin daña fiesta. Di mes caba cu secretario di estado Knops a laga sa na Hulanda cu e ta haya cu e cosnan na Aruba ta tardando demasiado. Kico por ta un mihor ruta den e tempo dificil aki? No cu nos ta consehero di gobierno, pero ta parce nos cu ta mihor pa ta mas abierto cu nos y bisa kico ta e cosnan cu den e cuadro di e asistencia di Hulanda ta spera di nos banda. Tambe pa e motibo cu tur cos palabra y acorda ta conta pa oposicion tambe. Nos por mira algo asina tambe den e discusion tocante e 35 miyon florin di austerisacion den AZV, unda esnan cu ta haya cu no mester corta ey, mester bisa anto ta na unda nan lo a desea di corta anto, si nan tabata den gobierno. Nos no ta mas na un momento pa scucha expresion gratuito di ningun hende. Ta tempo di guera, un recuperacion ta mes remoto cu e tabata seis luna pasa y tur hende cu tin trabao ainda, mester ta contento cu nan tin. Nos no tin tempo pa perde tampoco cu esnan cu ta haya cu ta otronan mester carga e peso. Tur hende mester contribui.