E linguista di Papiamento y miembro fundado di fundacion Lanta Papiamento, Ramon Todd Dandaré ta aplaudi e iniciativa di minister di Enseñansa, Armando Rudy Lampe di decreta 2018 como aña di Papiamento na Aruba. Un aña unda lo tuma luga un conferencia na nivel di linguistanan di Reino riba Papiamento. Pero un aña cu e ta spera cu e proposicion di ortografia di Papiamento por wordo aproba den parlamento.
Den e caso aki, sr. Todd Dandaré ta papia pa su mes bisando cu realmente aña di Papiamento tabata un peticion di fundacion Lanta Papiamento na prome instancia na ministerio di Cultura, y despues nan a hacie na ministerio di Enseñansa cu a honra e peticion aki a base di decision di conseho di minister di e gabinete actual.
Segun e linguista, 2018 ta bira e di tres aña cu nos tin aña di Papiamento. Y den cuadro di aña di Papiamento e mandatario Lampe di Enseñansa a bin cu e proposicion pa cuminsa cu e preparacion pa introduci enseñansa multilingual.
Segun e tin entendi, un di e actividadnan cu lo tuma luga den Aña di Papiamento 2018 tin di haber cu un conferencia grandi tocante Papiamento, eventualmente na luna di september. Den e actividad di e magnitud aki ta wordo invita conocedonan di idioma di e tres islanan ABC (Aruba,Bonaire,Corsou) y tambe di Hulanda unda tin e fundacion Splica cu ta promove Papiamento na Hulanda y seguramente nan lo haci su presencia den e conferencia aki. Tur esaki ta wordo desaroya den seno di un plataforma cu ta existi cu ta yama Plataforma Union di Papiamento, unda tin participacion di e fundacion Splica di Hulanda, ademas di dos fundacion di Bonaire, un di Corsou y un di Aruba cu ta fundacion Lanta Papiamento.
Ortografia di Papiamento
Un asunto importante cu a keda pendiente durante 2017 tabata e aprobacion di ortografia oficial di Papiamento cu a yega parlamento, pero cu te ainda no a wordo aproba. Sr. Todd Dandare ta haya cu den cuestion linguistico y di idioma mester tene cuenta cu historia tambe.
Historicamente pa loke ta ortografia di Papiamento tin un ortografia oficial cu ta data fei 1976. Pero segun e linguista na momento cu a aproba e ortografia aki, un di e puntonan cu a wordo palabra tambe ta, cu mas pronto posibel lo a nombra un comision pa revisa e ortografia ey. E ta corda cu Rudy Frank a trece hopi punto dilanti cu tabatin fayo den e ortografia. A pasa hopi tempo y e revision no a sosode y a mantene e ortografia ey. Pero e ta reconoce cu tabatin diferente incoreccion den e ortografia di 1976 cu tabatin mester di cambio. Den curso di tempo a wordo nombra diferente comision, y finalmente a yega na un proposicion na aña 2009 cu ta esun cu a bay parlamento di Aruba. Aunke prome cu esaki tabatin un caba na 1991 aproximadamente.
Pa loke ta e aprobacion di ortografia di 2009, tur cos tabata prepara pa e proposicion aki bay den votamento na parlamento den curso di aña 2017. Aunke e no a sosode, e tin entendi cu e proceso pa su aprobacion lo sigui den Staten. E ta haya cu lo ta bon cu den cuadro di aña di Papiamento nan por aproba e proposicion di ortografia aki cu berdaderamente no tin tanto diferencia cu e ortografia cu a wordo aproba na 1976. E diferencia special ta cu a wordo poni mas cla e forma oficial cu e palabra mester wordo skirbi.
E ta trece pa dilanti cu pa haci esaki mas facil for di aña 2009 tambe, ministerio di Enseñansa a publica un buki cu un lista di palabra cu e ta haya cu no ta completo. Te hasta tin hende ta kere cu e buki ey ta un diccionario. E ta referi na e buki conoci como buki blauw cu ta simplemente un buki cu un lista di palabra pa e hendenan facilmente por consulta ora cu tin duda riba e forma corecto di skirbi un palabra. Pero no tur palabra ta aden, ya cu e no ta completo, e ta splica.
Otro aspecto cu e ta haya importante den cuadro di Aña di Papiamento ta, si gobierno por nombra un comision atrobe pa amplia e buki blauw cu un gran cantidad di palabra cu falta, unabes cu e ortografia ta keda acepta. Nan ta palabranan no solamente comun y coriente sino palabranan huridico y cientifico tambe. E mes tin un lista cu ta surpasa e shen palabranan pa e buki blauw.
“Ta di spera cu di berdad e aña di Papiamento un di e puntonan clave lo ta aprobacion di ortografia ey y ampliacion di e lista di palabra.”
Interes internacional riba Papiamento
E ta considera cu e frontera di conocemento di nos lenga materno cada bes ta amplia y ta existi un gran interes internacional riba dje. Como un investigado di Papiamento pa ehempel e tabatin e honor di presenta aña pasa un tayer di Papiamento, pero tambe presenta charla na Universidad Nacional Autonomo di Costa Rica. E topico e biaha ey tabatin di haber riba enseñansa den e lenganan crioyo y e lenganan indigena den Caribe. Tambe el a yega di bay e isla Colombiano di San Andres, unda tambe ta wordo papia un lenga crioyo Ingles, caminda el a duna un tayer riba formacion di frase tanto den e lenga crioyo di San Andres y Papiamento.
