Aña 2024 a cera y 2025 a habri cu noticia di turistanan cu a accidenta cu ATV (quadracer). Pa hopi tempo caba comunidad ta pidi pa un miho control pa loke ta trata e uso di ATV y UTV na Aruba. No solamente pa motibo cu e ta dañino pa naturalesa, pero pasobra e ta peligroso tambe pa hende cu ta core e tipo di vehiculonan aki.

Prome cu cambio di aña a sucede un accidente den cercania di Kapel di Alto Vista. Un turista a bolter cu un ATV y a pidi pa asistencia di ambulance cu maximo urgencia. Pa motibo cu e caminda tabata den asina mal estado e vehiculo di ambulance mes no por a yega y e personal di ambulance a bay te na e sitio pa cuminsa atende e victima te ora cu e pick-up a yega cu equiponan pa trece e persona mas cerca pa asina por hib’e hospital cu varios complicacion.

Den e prome siman di e aña nobo otro accidente cu ATV a ser reporta, e biaha aki banda di Bushiribana caminda dos turista a resulta herida. Diahuebs dia 2 di januari a drenta informe di un accidente cu hende herida banda di Bushiribana y a dirigi tanto polis como ambulance na e sitio. Na yegada di e patruya a bin compronde cu un ATV cu dos turista riba dje lo a perde control y a bolter. Ambulance a atende e victimanan y a transporta nan pa hospital.

E topico di maneho di vehiculonan ATV y UTV ta uno cu ta keda vigente entre comunidad di Aruba. Na mas di un ocasion e medio di comunicacion aki a trece dilanti varios caso di preocupacion y keho di tanto ciudadanonan como instancianan cu ta expresa nan frustracion pa e falta di control riba e uso di e tipo di vehiculonan aki.

Un di e puntonan principal cu comunidad ta pidi un maneho y control mas estricto ta e impacto negativo cu e actividad di UTV y ATV, cu ta baha for di caminda, tin riba naturalesa di Aruba. Pa e motibo ey a pidi pa regula esaki hopi antes cu e causa mas daño na Aruba su flora y fauna.

Den pasado, ciudadanonan y organisacionnan ambientalista regularmente a pidi atencion pa e destruccion y molester causa pa e tipo di vehiculonan aki. Entre otro, NGO Aruba Birdlife Conservation (ABC) Foundation regularmente ta trece dilanti nan preocupacionnan pa proteccion di medio ambiente, como tambe casonan unda naturalesa y animalnan ta sali perhudica. Luna pasa, e fundacion a indica cu den luna di juni, shoconan a encontra diferente dificultad. Tres a muri di veneno, un a muri durante mantenemento di caya y dos a ser golpia pa vehiculo. E NGO ta remarca cu esaki ta solamente e casonan cu nan ta na altura di dje y cu pues e cifra di mortalidad ta probablemente mas halto pasobra no tur caso ta ser comparti cu nan.

Den luna di augustus ultimo minister demisionario di Transporte, Ursell Arends, a anuncia cu lo introduci un maneho nobo pa regula y reduci e permisonan di Utility Task Vehicles (UTV) y All-Terrain Vehicles (ATV).  E maneho tin como meta pa mitiga e impacto desastroso pa nos naturalesa, e molester na habitantanen y e siguridad di e usuarionan y Aruba su bishitantenan. 

Ya pa varios aña ta purbando di yega na un miho balans entre turismo aventurero y proteccion di naturalesa. E uso di UTV y ATV a trece un aumento di accident cu daño fisico y material, daño na nos naturalesa (flora, fauna y propiedadnan geo-morfologico), disturbio pa ciudadanonan (zonido y stof) y obstaculisacion di e fluho di trafico.

Gobierno di Aruba a instala un comision multidiscipliniario y un taskforce pa controla cumplimento di ley y reglamento relaciona cu vehiculonan di motor cu ta ser usa pa huur. A reduci caravana na solamente 10 vehiculo, pero esaki no ta suficiente.

Ministerio di Naturalesa y Transporte ta hiba un maneho di regula y reduci e permisonan pa opera e vehiculonan UTV y ATV den transporte publico. A base di consehonan ricibi di Directie Natuur en Milieu y Departamento di Transporte Publico, den cooperacion cu e instancianan cu a forma parti di e comision di conseho, lo introduci diferente cambio, entre nan rutanan alternativo pa UTV y ATV den transporte publico, pa minimalisa e disturbio den nos naturalesa.

E regulacion nobo lo resalta e compromiso di Gobierno di Aruba pa balansa turismo cu proteccion di naturalesa. Conservando y protehando nos areanan natural di vehiculonan di motor ta duna balor na nos ecosistema y economia.

Minister Arends a reuni tambe cu e companianan di UTV y ATC pa prepara pa e proceso di transformacion pa un maneho nobo. Durante e dialogo e mandatario y su ekipo a trece proposicionnan dilanti basa riba e consehonan di e comision como tambe su puntonan di bista pa un periodo di transicion exitoso.

E fase transitorio lo tuma luga pa e proximo 3 aña, cuminsando 1 di januari 2025 y lo termina na 2028, den cual e vision ta cu den 2028 tur compania a cambia nan actividad pa uno cu ta den harmonia cu naturalesa.

Entrante 1 di januari 2025, lo apunta tres ruta alternativo, regula desorden y velocidad, y alabes crea espacio di regeneracion di areanan di naturalesa afecta (natuurgebieden y natuur en landschap).

Pa 2026 lo pone fondonan disponibel pa “micro transition loans”, unda companianan chikito por aplica pa yuda cu e transicion pa un otro negoshi. Pa sigui incentiva e transicion di e sector lo traha cu programanan di certificacion den cual ta reconoce companianan cu a demostra boluntad y curashi pa cuida nos naturalesa y alabes stimula actividadnan diferente.